Trump yiyongeye mu bandi batangaje ku mugaragaro ko baziyamamariza gusimbura Perezida Barack Obama barimo Hilary Clinton na Jeb Bush.

Trump ubarizwa mu ishyaka ry’Abarepubulika ntabwo yigeze ahatana mu ishyaka rye gusa akaba yarakunze kuvuga ko babivuzeho.

Atangaza kandidatire ye, Trump yavuze ko mu buryo bwemewe aziyamamariza kuyobora Leta Zunze Ubumwe za Amerika ndetse ko ku bufatanye n’abazamutora, bazongera kugira Amerika igihugu gikomeye.

Yabitangarije mu nyubako ye ‘Trump Towers’ mu mujyi wa New York kuri uyu wa Kabiri.

Yavuze ko ubukungu bwe buzamwemerera kuba Perezida ukwiye wa Amerika.
Yakomeje agira ati “Igihugu cyacu kiri mu bibazo bikomeye. Ntabwo tukiri abatsinda na gato. Ni ryari hari uheruka kutubona dutsinda, reka tuvuge u Bushinwa mu bikorwa by’ubucuruzi? Baradutsinze. Natsinze u Bushinwa ibihe byose.”

Ntabwo byari byitezwe ko Donald Trump ashobora gutangaza ko aziyamamariza kuyobora iki gihugu cy’igihangange ku Isi, ndetse n’ishyaka rye ryabifataga akenshi nk’umukino.

Ibikorwa byo kwiyamamaza niryo shingiro rifatika ryo kubona amajwi muri Leta Zunze Ubumwe za Amerika, kandi Miliyari zirenga 8.5 z’Amadolari yashyizemo ziramwemerera kuba yazabasha gutungura ishyaka ry’Abarepubulika ku mwanya w’Umukuru w’igihugu.

Jeb Bush, Umuhungu wa George H. W. Bush nawe yatangaje ko aziyamamariza umwanya w’Umukuru w’igihugu ahagarariye ishyaka ry’Abarepubulika.

Trump asa n’uvuga kuri bagenzi be mu ishyaka batangaje ko baziyamamaza, barimo Jeb Bush na Marco Rubio yagize ati “Aba bantu bazatuyora gute?”

Yatangaje kandi ko mu gihe yaba atowe, yashyigikira ibijyanye n’uburenganzira bwo gutunga imbunda ndetse ko yanarinda gahunda za Amerika zirimo iy’ubuzima izwi nka Medicare na Medicaid.

Yavuze kandi ko yahita akuraho burundu ibwirizwa rya Perezida Obama ku bijyanye n’abimukira, byahita bituma abari muri Amerika badafite inyandiko zemewe batirukanwa.

Trump abaye umuntu wa 12 mu ishyaka ry’Abarepubulika utangaje ko aziyamamariza kuyobora Leta Zunze Ubumwe za Amerika.

Ubusanzwe Donald John Trump, ni umushoramari ukomeye muri Leta Zunze Ubumwe za Amerika, akaba umwanditsi ndetse n’umunyapolitiki.

Ni umuyobozi w’Umuryango ’The Trump’ akaba ari nawe washinze ikompanyi yitwa ’Trump Entertainment Resorts’ igenzura Trump Taj Mahal hotel n’inzu ikinirwamo urusimbi muri Leta ya New Jersey ho muri Amerika.

Forbes iherutse gutangaza ko umutungo we ari Miliyari 4 z’amadolari ya Amerika.