Umuryango “Dukundane Family”wibutse ku nshuro ya munani abatutsi bishwe bajugunywe mu mazi mu mugezi wa Nyabarongo n’Akanyaru, bakaba batarabonetse ngo bashyingurwe mu cyubahiro mu nzibutso zisanzwe mu gihugu.

Umuhango wo kwibuka izi nzirakarengane wabereye mu murenge wa Ntarama Akarere ka Bugesera tariki 10 Gicurasi 2014.

Benimana Alain, umuyobozi w’Umuryango Dukundane Family, yasobanuye neza impamvu bakomeza guha agaciro umuhango wo kwibuka buri mwaka abajugunywe mu migezi.

Yagize ati “ Iki gikorwa gitegurwa buri mwaka, tuzirikana iyi migezi n’inkombe zayo by’umwihariko urufunzo rwayo byakoreshejwe nk’intwaro yo kwica Abatutsi muri Jenoside”.

Yemeje ko bazirikana neza benshi bishwe kugeza n’ubu imibiri yaboikaba itaboneka kuko aya mazi bayafata nk’imva nubwo atari urwibutso rwihariye nk’uko hasanzwe hazwi kiriziya nizindi nzu z’inzibutso, bakaba baratekereje ko igikorwa nk’iki giha umwanya abaharokokeye n’Abanyarwanda muri rusange gusubiza agaciro abakambuwe.

Yasoje asaba ko hakubakwa urwibutso rwihariye rwerekana neza amateka nkaya y’imigezin’inzuzi asoza yifuza ko amazi ubusanzwe asanzwe aduha ubuzima atazongera kutwambura ubuzima ukundi.

Igikorwa cyatangijwe n’urugendo rwo kwibuka, aho umuyobozi w’Akarere ka Bugesera, Bwana Rwagaju, wanatanze ubutumwa buto bw’imiterere y’Umurenge wa Ntarama ahabereye umuhango wo kwibuka.

Rwagaju yatanze ubutumwa bw’uko amazi n’urufunzo byakoreshejwe nk’intwaro yo kwica abatutsi muri Jenoside, ndetse ko n’aho umugezi wa Nyabarongo ufite inkomoko hose hari hatuwe n’Abatutsi cyane.

Yatanze urugero rwa, Ruhuha, Nyaruguru n’ahandi, by’umwihariko Ntarama na Nyamata hari abatutsi biciwe murufunzo rwari rwariswe CND kuko hihishe abatutsi benshi bakanahapfira.

Kuri we, abishe bari barabanje kwica ubumuntu n’ imitekerereze. Yashimiye umuryango Dukundane Family yatekereje kiriya gikorwa ngaruka mwaka cyibuka by’umwihariko abatutsi bajugunywe mu gihe cyo kwibuka inzirakarengane z’abatutsi bishwe muri rusange.

Habumuremyi Roger, umwe mu barokokeye mu gishanga cyari cyariswe CND yasobanuye ubuzima yabayeho mu 1994 mu rufunzo . Yavuze ko kubera yari yatemaguwe amaguru n’amaboko atabashaga no kugenda byabaye ngombwa ko se umubyara amusiga amazirantoki kugira ngo interahamwe nizimugeraho zigirengo yamaze gupfa kandi yaraboze.

Yasobanuye uko yabaye muri Kiliziya ya Ntarama yiciwemo ibihumbi by’Abatutsi, mu rufunzo n’ahandi kugeza ubwo ingabo za RPA zamusangaga akirimo akuka akavurwa, ubu akaba yemeza ko ari umugabo wubatse kandi akomeje kwiyubaka.

Egide Nkuranga, Visi Perezida w’Umuryango uharanira inyugnu z’Abarokotse Jenoside yakorewe Abatutsi (Ibuka), yashimiye Dukundane Family anasaba buri wese kwifatanya n’imiryango nk’iyi hanashyirwa ibaraga mu guhangana n’abapfobya Jenoside.

Yatanze izindi ngero z’imiryango yibuka inzirakarengane zishwe zijugunywa mu mazi nka “Association Humura”, yibuka abajugunywe muri Lac Victoria.

Minisitiri w’Umuco na Siporo, Protais Mitali, wari witabiriye uyu muhango yavuze ko hakwiye ubuvugizi bwo gutunganya urwibutso rw’umwihariko rusobanura neza amateka n’ubuhamya bivuga uburyo amazi yakoreshejwe nk’intwaro mugihe cya Jenoside.

Yongeyeho ko Leta y’u Rwanda yifuza ko ibikworwa nk’ibi byakwitabirwa cyane abantu bakagira ubutwari bwo kuvuga amateka.

Minisitiri Mitali yasabye urubyiruko kutarangazwa n’abarushuka barutwara mu murongo utari wo ari na rwo abavugwaho kuba abanzi b’igihugu bahanzeho amaso.