Abanyeshuri b’abakobwa 400 bahagarariye bagenzi babo mu mashuri makuru na za kaminuza za Leta n’izigenga 30, bibumbiye mu muryango w’abarokote Jenoside yakorewe Abatutsi mu mwaka wa 1994 (AERG), bongerewe imbaraga n’umwiherero wabubakiye icyizere cyo kwiyubaka bagendeye ku kwisungana, umuhamagaro wabo no guhangana n’ubuzima bw’ishuri bahuriramo n’ibishuko byababuza ahazaza.
Mu muhango wo gusoza uyu mwiherero wabaye mu byiciro bibiri harimo icyo kuwa 27-29 Nzeri no ku ya 5-6 Ukwakira 2013, aba bakobwa bashimangiye ko batakiri abo guheranwa n’amateka ngo ababuze kwihitiramo ibyabateza imbere n’igihugu cyababyaye.
Kaligirwa Judith, wiga mu mwaka wa mbere mu ishuri Rikuru ryigenga rya Kigali ULK yagize ati “Twifitemo imbaraga ku buryo tutagakwiye gufatiranwa na ba rusahurira mu nduru ngo badushuke, baduteshe intumbero yacu. Nkatwe twiga mu mashuri makuru, hari ababa barekereje gufatira mu nkovu twasigiwe n’ahashize.”
Dukuzimana we ati “Namaze kumenya ko ari jye muyobozi w’ubuzima bwanjye. N’ubwo ntakwibagirwa burundu ubwigunge nasigiwe n’amateka, ntibyambuza kubaka umuhamagaro wanjye. Mfite imbaraga zihagije zo gutegura ahazaza hanjye nk’uko insanganyamatsiko y’uyu mwiherero ibivuga.”
Madamu Jeannette Kagame wasoje umwiherero, yashimiye AERG ikomeje gufasha abanyeshuri b’imfubyi kurerana mu miryango bafashanya mu kurenga ihungabana, n’abatishoboye bakabona inkunga ibakura mu bwigunge.
Yongeye kubibutsa kutishora mu ngeso mbi bitwaje ubukene cyangwa ko ari incike kuko imbaraga bifitemo bazikoresha bakigeza aho bifuza kugera.
Madamu Jeannette Kagame yagize ati “Ubuzima bwa Kaminuza habamo ibishuko bitandukanye, twagira ngo tubasabe mwige kumenya guhitamo, kandi mumenye kuvuga ‘oya idacagase’. Muzirikane ko abo bahungu cyangwa ba sugar daddy babashuka, ingaruka zitabageraho kimwe.”
Rukundo Constantin, umuhuzabikorwa w’umuryango AERG ku rwego rw’igihugu yagize ati “Umuryango ugizwe n’abasore n’abakobwa basaga 43 000, impanuro bashiki bacu babonye twizeye ko zigiye kubafasha ntituzongere kubona ububare wiyongera kuri 48 batwaye inda batateguye, bamwe bikabaviramo kureka ishuri.”
Abandi bifatanyije na Madamu Jeannatte Kagame mu gusoza umwiherero w’abanyeshuri b’abakobwa bo mu muryango AERG biga muri Kaminuza, barimo Dr Vincent Biruta Minisitiri w’Uburezi, Dr Alivera Mukabaramba Umunyamabanga wa Leta muri Minisiteri y’Ubutegetsi bw’igihugu ushinzwe imibereho myiza y’abaturage, Odette Uwamariya Guverineri w’intara y’Iburasirazuba, Eng Theophile Ruberangeyo Umuyobozi wa FARG, Dr Jean Pierre Dusingizemungu Perezida wa Ibuka, Abakuru b’ingabo na Polisi mu ntara y’Iburasirazuba.
TANGA IGITEKEREZO