Urubanza rwa Ingabire Victoire Umuhoza rwabaye mu muhezo ubwo umutangabuhamya utazwi wo ku ruhande rwa Ingabire yakurikirwaga mu rukiko. Abanyamakuru n’abandi basanzwe bakurikira urubanza basabwe gusohoha hanze kugera rusojwe.

Ntabwo bimenyerewe ko Urubanza rwa Ingabire ruba mu muhezo,ariko byaje gutungurana ubwo abanyamakuru, abaturage bari baje kurukurikira n’abanyamahanga basohowe mu rukiko, hasigaramo gusa ubushinjacyaha, urukiko, abunganizi babiri ba Ingabire n’abareganwa nawe.

Habanje kuba impaka ku mpande z’Ubushinjacyaha, urukiko n’abunganizi ba Ingabire, babaza niba ugiye gutanga ubuhamya yakurikirwa n’abari mu rukiko badafite aho bahuriye n’urubanza. Urukiko rwaje kwanzura ko bose basohoka hanze.

Ntawe uzi neza niba umutangabuhamya wakurikirwe uyu munsi ari uwiyise Kayitesi Claire nk’uko byatangajwe na Me Gatera Gashabana ku ya 9 Gicurasi 2013, ubwo yavugaga ko bashaka ko umutangabuhamya wahisemo gufata izina rya Kayitesi, ubutaha yatanga ubuhamya atagaragara mu maso ya benshi kubera impamvu z’umutekano we.

Ingabire Umuhoza Victoire ari kwiregura mu bujurire mu Rukiko rw’Ikirenga nyuma yo gukatirwa n’Urukiko Rukuru rwa Kigali igifungo cy’imyaka 8.