Urubanza rwa Kizito Mihigo na bagenzi be rwagombaga gusubukurwa kuri uyu wa Gatanu ku ya 12 Ukuboza rwasubitswe kuko babiri mu bacamanza bagize inteko iburanisha basoje icyiciro cya 3 cya Kaminuza (Masters) muri Kaminuza yigenga ya Kigali, ULK..

Uru urubanza ruburanishwamo Kizito Mihigo na bagenzi be Ntamuhanga Cassien, Dukuzumuremyi Jean Paul na Niyibizi Agnes, rwimuriwe ku ya 19 Ukuboza 2014.

Umuvugizi w’Inkiko mu Rwanda, Itamwa Emmanuel yabwiye IGIHE, ko uru rubanza rwimuriwe ku wa 19 Ukuboza 2014, kandi ko ababuranyi bose babimenyeshejwe mbere.

Kizito na bagenzi be mu rukiko

Kuri gahunda y’iburanisha hari hateganyijwe ko Dukuzumuremyi Jean Paul akomeza yiregura ku byaha bitatu aregwa, ari byo: gufasha kurema umutwe w’abagizi ba nabi, kugambirira kugirira nabi ubutegetsi buriho, no gucura umugambi w’igikorwa cy’iterabwoba. Yari gukurikirwa na Niyibizi Agnes utari waburanishwa.