Itsinda ry’urubyiruko rw’Abafaransa bagera kuri 20 ku munsi w’ejo ku Cyumweru bageze mu Rwanda, mu ruzinduko rugamije kwamagana uruhare rw’u Bufaransa mu gutegura no gushyira mu bikorwa jenoside yakorewe abatutsi muri Mata 1994.

Nk’uko byatangajwe na Newtimes, iri tsinda rigizwe n’ abayobozi b’ urubyiruko mu mitwe ya politiki, imiryango y’abanyeshuri, imiryango irwanya irondakoko, bose bibumbiye mu Muryango w’u Burayi urwanya irandakoko uhereye mu mizi, EGAM (European Grassroots Antiracist Movement).

Bakigera I Kigali, Benjamin Abtan, Umuyobozi wa EGAM ari nawe waje ayoboye iri tsinda, yavuze ko bazanywe mu Rwanda no kwamagana uguceceka kwabayeho ku ruhare rwa bamwe mu Bafaransa muri jenoside yakorewe abatutsi mu 1994.

Yagize ati “Mu Bufaransa, urubyiruko rw’ubu ntirubyumva kimwe n’ abakuze ku byerekeye uruhare igihugu cyacu cyagize muri ubwo bwicanyi ndengakamere”.

Uhereye ibumoso: Umuyobozi wa EGAM Benjamin Abtan, Umunyamakuru w' Umufaransa Patrick de Saint Exupéry na Alain Intwaza, Umuhuzabikorwa wa GAERG

Abtan yasobanuye ko Abafaransa bakuze bagaragaweho no kutita kuri icyo kibazo.

Ati “Ariko twe dukeneye ukuri n’umucyo (kuri icyo kibazo)”

Laura Slmani, umuyobozi w ‘urubyiruko rwo mu ishyaka ry’Abasosiyalisiti mu Bufaransa, avuga ko abantu benshi mu Bufaransa batazi na busa imikoranire yari hagati ya Guverinoma ya Francois Mitterrand na Guverinoma y’u Rwanda yateguye ikanashyira mu bikorwa jenoside mu myaka makumyabiri ishize.

Ati “Turagenzwa no kugirango Abafaransa basobanukirwe ukuri kose”.

Mu itangazo rirambuye abagize EGAM basohoye mu cyumweru gishize ryari rifite umutwe ugira uti “Tutsi Genocide: Now is time for the trugh!” tugenekereje mu Kinyarwanda bivuga, “Jenoside yakorewe abatutsi: Ubu ni igihe cy’Ukuri”; ryagaragazaga bimwe mu bimenyetso byerekana uruhare ntashidikanywaho rw’u Bufaransa muri jenoside bakanahamagarira gushyira iherezo ku gukomeza guhisha uko kuri.

Mu ruzinduko rwabo ruzasozwa tariki ya 29 Kamena 2014, iri tsinda rirateganya kuganira n’abantu batandukanye ku buryo jenoside yateguwe, uko yashyizwe mu bikorwa ndetse n’iterambere ry’u Rwanda nyuma ya jenoside.

Bazasura ahantu hatandukanye habitse amateka ku ruhare rw’u Bufaransa muri jenoside nko mu Bisesero, I Murambi n’ahandi. Bazasura kandi abapfakazi n’imfubyi za jenoside mu bice bitandukanye by’igihugu.

EGAM ihuriyemo imiryango isaga 35 ituruka mu bihugu 29 byo ku mugabane w’u Burayi.