Ku manywa yo kuri uyu wa Gatandatu tariki ya 4 Ukwakira 2014 nibwo akabari kitwa Canaberra gaherereye ku muhanda w’amabuye i Remera ahakunze kwitwa ku Gisimenti kafashwe n’inkongi y’umuriro.

Aka kabari kari kamaze iminsi igera kuri 7 gafunguye imiryango, kahiriyemo firigo enye nini, Televiziyo ebyiri zigezweho (flat screen), intebe zitari nke, ameza n’ibindi bikoresho byinshi. Hangiritse igikoni cyatunganyishijwe asaga miliyoni 10 ngo hatarajyamo ibikoresho byacyo bihenze nabyo byatikiriyemo.

Canaberra yangirikiyemo kandi inzoga zihenze (liqueurs) zifite agaciro gasaga miliyoni 7 z’amafaranga y’u Rwanda. Hanangirikiyemo izindi nzoga, ibinyobwa bidasembuye n’ibindi bikoresho bihenze; ibyahiye byose bifite agaciro k’amafaranga y’u Rwanda asaga miliyoni 50.

Aka kabari ni ak’uwitwa Mutijima Viateur.

Mu kiganiro n’Umuvugizi wa Polisi y’u Rwanda mu Mujyi wa Kigali Supt Mbabazi Modeste yatangarije IGIHE ko inkongi y’umuriro yatewe n’abasudiraga muri aka kabari.

Bamwe mu babibonye bavuga ko ubwo basudiraga hari ibishirira byatakaraga ku mifariso bakoreshaga bashyira muri aka kabari ibitangira amajwi biyabuza gusohoka(sound proof).

Polisi y'u Rwanda ireba icyateye iyi nkongi

Nyir'akabari yaramuye bike

Byinshi mu byari muri aka kabari byatikiriyemo

Hakongotse byinshi