Umuvunyi mukuru yavuze ko iki ari ikibazo kimaze gufata indi ntera ku buryo abantu benshi biyitirira inzego n’ibigo bikomeye mu kuriganya abantu ibyabo bifashishije telefone.

Yagize ati "Ni ikibazo gitangiye gufata indi ntera muri iyi minsi, ngirango hari n’abantu twabonye biyitiriye urwego rw’umuvunyi,inzego z’inkiko, biyita abacamanza, agahamagara abaturage akababwira ngo ndi umucamanza, mfite urubanza rwawe kandi kugirango ruzacibwe ugomba kohereza amafaranga kuri Mobile Money”

Yakomeje agira ati “Ariko noneho muri iyi minsi twabonye n’abiyitirira inzego zitanga akazi, agahamagara umuntu aziko yagiye gupiganirwa umwanya w’akazi… tubona rero biri gufata indi ntera, bamwe banakoresha Telefone zo mu bihugu duturanye”

Urwego rw’umuvunyi rufata ubujura bukorerwa kuri Telefone nka kimwe mu bikururira abaturage akarengane rugasaba inzego zitandukanye guhagurukira kuburwanya dore ko bugeze no ku rwego rwo kwiyitirira inzego nkuru z’Igihugu.

Umuvunyi Mukuru Aloysie Cyanzayire avuga ko abakora ubu bujura basigaye biyitirira inzego nkuru z'igihugu