Mu ngingo ya 11 y’Itegeko rigenga amatora ryariho, yashyiraga abantu mu byiciro ikavuga ko uwakatiwe burundu kubera icyaha cya Jenoside cyangwa ibyibasiye inyokomuntu wo mu rwego rwa mbere n’urwa kabiri nk’uko byateganywaga n’itegeko ryagengaga inkiko Gacaca atemerewe gutora cyangwa gutorwa.
Ryanakumiraga kandi uwireze akiyemerera icyaha cya jenoside cyangwa ibyaha byibasiye inyokomuntu bimushyira mu rwego rwa mbere.
Umunyamabanga Nshingwabikorwa wa Komisiyo y’Igihugu y’Amatora, Munyaneza Charles, yavuze ko mu gihe iryo tegeko ryaba ryemejwe, uwahamwe n’ibyo byaha wese atazajya atora. Bivuze ko nta byiciro byakongera gushyirwamo.
Yagize ati “Iyo urebye itegeko ryari risanzwe ry’amatora, iyo ugiye mu ngingo yaryo ya 11 ryari rifite ibyiciro bitandukanye by’abantu bakoze Jenoside banahamwe nayo mu buryo butandukanye.”
Ati “Icyaha cya Jenoside cyakozwe mu buryo butandukanye, hari abagize icyo gitekerezo, hari abakanguriye abaturage gukora Jenoside, hari n’abayikoze barimo abasahuye, abarangaga abantu aho bihishe, bikaba byaratumaga bashyirwa muri ibyo byiciro.”
Yavuze ko imanza nyinshi zaciwe mu rwego rwa Gacaca hari itegeko ryayo ryavuyeho, ari naryo ryashyiraga abantu muri ibyo byiciro bitewe n’uruhare buri muntu yagize muri Jenoside.
Gusa uburyo mu mushinga w’Itegeko rishya byanditse rivuga ko uwahamwe n’icyaha cya Jenoside, haba abateguye, abakanguriye abandi, abayishyize mu bikorwa n’abandi bose bahamwe n’icyo cyaha ko badakwiriye kuba batorwa cyangwa ngo batore.
Depite Muhongayire Christine yavuze ko iyo umuntu yakoze icyaha nta yindi mpamvu ikwiye kubaho yo kugisuzuma.
Yagize ati “Uwakoze icyo cyaha aba yagikoze kandi nta mpamvu yo kuvuga ngo yajya gutora cyangwa gutorwa gusa bijye gusuzumwa neza.”
Abadepite bagize komisiyo basabye Abanyamategeko ba Komisiyo y’Igihugu y’Amatora kunonosora iyi ngingo kugira ngo bayinoze kurushaho bashingiye ku byari biteganyijwe mu itegeko rya 2010 ryagengaga amatora.
TANGA IGITEKEREZO