Bwa mbere, Ikigo cy’igihugu gishinzwe guteza imbere ubumenyi ngiro (WDA) cyasohoye impamyabumenyi z’abanyeshuri 51851 barangije kuva mu mwaka w’amashuri wa 2011.

Abanyeshuri barangizaga amashuri yisumbuye y’imyuga n’ubumenyi ngiro, WDA yabahaga icyangombwa gisimbura impamyabumenyi z’umwimerere zari zitaratangira gutanwa n’iki kigo cyatangiye imirimo mu 2010.

Umuyobozi wa WDA Gasana Jerome yerekana ko impamyabushobozi zasohowe bitoroshye kuzigana

Umuyobozi wa WDA, Gasana Jerome, yatangaje ko icyatumye imyaka igera kuri itatu yose, abanyeshuri badahabwa impamyabumenyi z’umwimerere hari hakigwa uko zanozwa ku buryo zitakwiganwa.

Mu gikorwa cyo gutangiza gutanga impamyabumenyi, Umuyobozi wa WDA yazihaye abanyeshuri babaye aba mbere mu bizamini bisoza amashuri yisumbuye mu myaka itatu yikurikiranya kuva mu 2011. Abo ni Gasana Maurice warangije iby’ikoranabuhanga mu itumanaho mu 2011, Ikirezi Sumaya wize Ubukanishi rusange mu 2012 na Nyiramana Josiane warangije mu 2013 mu by’ubwubatsi.

Abanyeshuri babaye aba mbere mu mashuri yisumbuye mu myuga n'ubumenyingiro

Abayobozi b’ibigo by’amshuri bahise bahabwa impamyabumenyi z’abanyeshuri babirangijemo, guhera kuwa 31 Ukuboza ba nyira zo bashobora kujya kuzifata aho bize. Abakoze ari abakandida bigenga bo bazajya bazifatira ku biro bya WDA i Remera.

Gasana yijeje itangazamakuru ko ubwo zitangiye gutangwa mu gihe gitaha abazajya barangiza bitarenze amezi ane cyangwa atanu bazajya bahita bazihabwa.

Mu mibare igaragazwa na WDA, ab’igitsina gore nibo benshi kuruta abagabo mu barangije muri iyi myaka itatu. Abagabo ni 25,910 (49.9%) naho abagore ni 25,941 (50.03%).

Ikirezi Sumaya wize Ubukanishi rusange, akaza no ku isonga mu barangije mu 2012, avuga ko yahisemo kwiga ubumenyi ngiro kuko ari bwo bugezweho, kandi n’abakobwa nta kwitinya.

Yagize ati “Nabuhisemo kuko nabonaga abakobwa bitinya kandi natwe twabishobora kuko ubu ntibigisaba ingufu , bisaba gusa kuba ufungutse mu mutwe.”

Yizeye ko narangiza kwiga no mu ishuri Rikuru ry’ubumenyi Ngiro rya Kicukiro(IPRC Kicukiro) nta guhangayikira akazi azagira, kuko ashobora no kuzakihangira.

Umuyobozi wa WDA avuga ko abanyeshuri biga ubumenyi ngiro batozwa hakiri kare kwihangira imirimo, kandi uko biga bagashyira mu ngiro ibyo bigishijwe mu ishuri ku buryo buri wese arangiza koko abereye isoko ry’umurimo. Ureste ibyo , WDA ifite gahunda yo umunyehuri urangije imufasha kumuhuza n’ibigo kimwe n’amabanki yamuguriza mu gutangira umushinga yakwihangira.

Mu gihugu hose habarurwa ibigo by’amashuri byigisha imyuga n’ubumenyingiro 365, byigwamo n’abanyeshuri babarirwa mu bihumbi 93.

[email protected]