Mu ijoro ryo ku Cyumweru tariki 17 Kamena 2012, abantu bataramenyekana basibye amazina y’abazize Jenoside yakorewe
Abatutsi bajugunywe mu mugezi wa Nyabarongo, yari yanditse ku rwibutso ruri mu Murenge wa Rugendabari ho mu Karere ka Muhanga.

Ndayisabye Aimable uyobora Umurenge ibi byabereyemo, yatangarije IGIHE ko aya mazina yari yanditswe ku makaro ari ku rwibutso, abo bantu batazwi bagerageza kuyasiba bakoresheje amabuye. Yagize ati:”Urebye ntago bayasibye neza, banyujijemo imisharu bakoresheje amabuye.”

Uyu muyobozi yakomeje avuga ko bafatanyije na Polisi ndetse n’ingabo bakoze iperereza basanga abashinzwe kurara irondo uwo munsi bari basibye, bityo bafatirwa ibihano. Aba banyerondo bategetswe gutanga indishyi y’amafaranga 10,000 buri umwe, azasana ibyangiritse ndetse bakajya bagera ku rwibutso saa kumi n’ebyiri z’umugoroba (18h00).

Vital Nyakayiro, ushinzwe kwibuka no kubika amateka muri IBUKA yatangarije Kigali Today ko babajwe cyane n’iki gikorwa kibi, agira ati: ”Nka IBUKA duhangayishijwe n’abantu bagifite ingengabitekerezo ya Jenoside, bagishaka gutema abarokotse aho kubafasha. Tubona gusiba amazina y’abazize Jenoside ari ikimenyetso cy’ikigero cy’ingengabitekerezo”.

Umuyobozi w’Umurenge wa Rugendabari we yabwiye IGIHE ko batari bamenyereye ibyaha by’ingengabitekerezo mu Murenge wabo, ariko kandi ko batakwemeza ko byakozwe n’abo mu murenge wabo. Yagize ati:”Aho ibi byabereye ni ku mbibi z’Akarere ka Ngororero na Muhanga, wasanga ari n’abantu bo hakurya babikoze kuko hanaba abasinzi n’abanywarumogi benshi.”