Ubucuruzi bw’amabuye y’agaciro bukorwa mu buryo butemewe n’amategeko n’abakozi ba Sosiyeti zicukura zikanagurisha amabuye y’agaciro yo mu bwoko bwa gasegereti mu karere ka Bugesera, bwahagurukiwe n’inzego z’umutekano muri ako karere, nyuma y’aho bigaragarariye ko hari amabuye y’agaciro acukurwa akajyanwa mu Burundi.

Mu nama yabereye i Nemba mu karere ka Bugesera, mu cyumweru gishize, abacukuzi b’amabuye y’agaciro bahuye n’ubuyobozi bwa Polisi, ingabo hamwe n’abayobozi b’ikigo gishinzwe umutungo kamere, n’ubuyobozi bw’Akarere ka Bugesera, byagaragajwe ko hari bamwe mu bacukura amabuye y’agaciro bayajyana i Burundi, abafashwe bakaba bari mu maboko ya Polisi.

Rukundo Julius, Umuyobozi w’Akarere Wungirijwe ushinzwe ubukungu n’iterambere mu Karere ka Bugesera, yaburiye abari aho agira ati "Nubwo muhisha ukuri, birazwi ko hari bamwe muri mwe mufite uruhare mu gucuruza amabuye mu buryo bunyuranyije n’amategeko, nizere ko muzi ko hari ibihano bifatirwa abaya umutungo kamere w’igihugu.”

Na ho Umuyobozi Mukuru w’ikigo cy’umutungo kamere mu Karere ka Bugesera, Roderick Marshall, yatangaje ko bamwe mu bafashwe bagurisha uyu mutungo kamere ku buryo butemewe n’amategeko, bamaze kugezwa imbere ya Polisi, kugira ngo bakurikiranwe n’inzego z’ubutabera.

Yagize ati “Twasabye inzego z’ubuyobozi mu Karere kuganira n’aba bacukuzi kugira ngo iki kibazo gikemuke.” Yakomeje avuga ko bashyizeho abantu bagera kuri 15 bazajya barara ijoro kugira ngo bacunge umuntu wese wagerageza kwiba uyu mutungo kamere awugurisha ku buryo butemewe n’amategeko.

Nk’uko tubukesha The New Times, n’ubwo ubuyobozi buvuga ibi, ngo bamwe mu bakora akazi ko gucukura ayo mabuye ya gasegereti, batangarije abo bayobozi ko abakoresha babo, batabishyura amafaranga baba bakoreye, ngo akenshi akaba ari yo mpamvu usanga bamwe bahitamo kwishora muri iki gikorwa cyo kugurisha uwo mutungo kamere ku buryo butemewe n’amategeko kugira ngo biyishyure.

Abayobozi bitabiriye iyo nama, basabye abayobozi ba sosiyeti zicukura ayo mabuye ya gasegereti, kujya baganira n’abakozi babo bityo bagakemurira hamwe ibyo bibazo, ariko bakangurira abo bakozi ko aho kujya bishora muri ibyo bikorwa binyuranyije n’amategeko, ahubwo bajya biyambaza inzego z’ubuyobozi zikabafasha gushaka umuti w’ibibazo byabo.