Mu mujyi wa Montréal muri Canada, Umuryango PAGE-RWANDA bafunguye inzu ndangamateka kuri Jenoside yakorewe Abatutsi mu Rwanda muri Mata 1994.

Mu kiganiro twagiranye na Mukabalisa Monique na Jean Paul Nyirinkwaya badutangariza ko igitekerezo cyo gushinga iyi nzu ndangamateka (Centre de documentation et de référence) kuri Jenoside yakorewe Abatutsi, cyatangiye mu 2007.

Umushinga watangiye witwa Concordia uhuriwemo n’andi mashyirahamwe, abanyeshuri n’abashakashatsi bo muri za kaminuza, baganira ku mateka ya Jenoside yakorewe Abatutsi, Page Rwanda (Association des Parents et Amis des Victimes du Génocide au Rwanda) na yo yinjiramo.

Concrdia irangiye Page-Rwanda yarakomeje kuko abantu bari batangiye kumva ko abana baton a bo bagomba kumenya amateka igihugu cyanyuzemo. Mu ngorane bahuraga na zo ni uko bamwe byabagoraga kujya imbere y’abantu ngo batange ubuhamya, ariko ubu abenshi basangiye amateka byatumaga bagira icyizere no ntibibe inzitizi.

Hakomeje gushakwa ibindi bakora, nko gukurikira ibiganiro bitangwa n’abavuye mu Rwanda, ubu hakaba hari ibigera kuri 85 bibitse. Batangiye kandi gukorana na Komisiyo yo Kurwanya Jenoside - CNLG, mu rwego rwo guhana amakuru cyangwa ibitabo n’ibindi byose byateza imbere inzu ndangamateka yabo.

Bafite kandi gahunda yo gukorana n’Urwibutso rwa Jenoside rwa Kigali ruri ku Gisozi (Centre Mémorial de Kigali) mu guhana amakuru, harimo no gutunganya website kugira ngo bashobore kubona amakuru bitagoranye kandi iyo nzu ndangamateka igakorera muri Canada na Amerika ya ruguru, herekanwa inkomoko ya Jenoside yakorewe Abatutsi.

Amavu n’amavuko ya PAGE-RWANDA

PAGE-RWANDA yatangiye muri Kamena 1994 ubwo mu Rwanda hakorwaga Jenoside. Abanyarwanda babaga muri Canada bajyaga mu kiriyo cy’ababo barimo bicwa ni bwo havuyemo bamwe batekereza icyakorwa kugira ngo hatazagira abahakana ko Jenoside yabaye, hashingwa uwo muryngo muri Gicurasi wemerwa n’amategeko muri Nzeri. Page-Rwanda ikaba yaranagize uruhare mu ishingwa rya IBUKA-Rwanda mu ntangiriro.

Intego zayo zikaba gukomeza kubaho, Ubutabera, gushyira hamwe no kwibuka Jenoside yakorewe Abatutsi ngo bitazongera kubaho ukundi.

Bamwe mu bagize ubuyobozi bwa PAGE-RWANDA i Montreal muri Canada

Bimwe mu bikorwa bya PAGE-Rwanda

Page-Rwanda buri mwaka mu kwezi kwa kane itegura icyunamo, kikaba ari na cyo gikorwa gihuza abanyarwanda benshi buri mwaka muri Canda.

Uyu muryango wagize uruhare rukomeye cyane muri Canada na Amerika ya ruguru mu byerekeranye no gucira imanza abakoze cyangwa abakekwaho kugira uruhare muri Jenoside mu Rwanda; nk’urubanza rwa Désire Munyaneza w’i Butare, hari n’izindi zikorwaho ubushakashatsi bwimbitse.

Page-Rwanda ihangaha n’abashaka gupfobya cyangwa guhakana Jenoside yakorewe Abatutsi, ufite abawuvugira mu Nteko Ishinga Amategeko yo mu mujyi wa Montréal. Mu 2002 bafashije abana b’imfubyi babagurira amazu agera kuri 4 i Ngoma.

Mu bitabiriye umuhango wo gufungura iyo nzu ndangamateka hatumiwemo Gén. Roméo Dallaire, ngo ahabwe ishimwe ku buhamya yatanze, igihembo na we yishimiye cyane.