Umuryango w’ubukungu w’ibihugu by’ibiyaga bigari (CPGL) wakiriye amayero 300 000 ni ukuvuga asaga miliyoni 267 z’amafaranga y’u Rwanda, azafasha mu rwego rw’ubucuruzi bwambukiranya imipaka hagati y’igihugu cy’u Rwanda, u Burundi na Repubulika Iharanira Demokarasi ya Congo (RDC).

Umunyamabanga wungirije ushinzwe imari muri CPGL Liliane Gashumba ubwo yari ku Gisenyi ku wa 1 Werurwe 2013, yavuze ko aya mafaranga yatanzwe n’igihugu cya Espagne binyujijwe muri gahunda nshya y’ubufatanye mu iterambere rya Afurika (NEPAD).

Ayo mafaranga azafasha mu iterambere ry’ibihugu byo mu karere k’ibiyaga bigari, nko kubaka isoko ntangarugero rizahurirwaho n’ibihugu byo muri CPGL, binafashe mu guhangana n’ikibazo cy’ubucuruzi bwambukiranya imipaka bukorwa mu buryo bunyuranyije n’amategeko.