Mu kiganiro n’abanyamakuru cyaberereye muri Telecom House kuri uyu wa Kabiri tariki ya 19 Kamena, abahagarariye ikinyobwa cya Cocacola muri Bralirwa batangije kumugaragaro igikorwa cyo gukundisha Afurika Abayituye kiswe “Billion reasons to believe in Africa” mu Kinyarwanda bishatse kuvuga impamvu miliyari zatuma wiyumva muri Afurika.

Iki gikorwa kizagaragara kuri Facebook na Twitter, ndetse cyamamazwe ku maradiyo, mu binyamakuru ndetse no ku matelevisiyo atandukanye.

Jan Van Velzen ushinzwe ubucuruzi muri Bralirwa n’abandi bose baje bakuriye itangizwa ry’iki gikorwa bagaragaje impamvu nyinshi zatuma umuntu yiyumva muri Afurika, harimo kugira perezida w’umugore, nyampinga w’Isi uvuka muri Angola, Nelson Mandela nk’ikitegererezo ku Isi, inteko ishingamategeko ibamo abagore benshi mu Rwanda, Perezida Paul Kagame w’u Rwanda umaze guhabwa ibikombe bigera kuri makumyabiri, iterambere rya Afurika mu bukungu riri kuzamuka cyane n’ibindi byinshi bikaba aribyo bizibutswa Abanyafurika ngo barusheho kuyikunda no kuyiyumvamo.

Abanyamakuru bifuje kumenya icyo iki gikorwa kizafasha abaturage b’u Rwanda cyangwa aba Afurika muri rusange, maze Reni umukozi muri Bralirwa asubiza ko iki gikorwa kizaba gifite intego yo gukundisha Abanyafurika umugabane wabo. Reni kandi yavuze ko iki gikorwa kizamara imyaka itatu ndetse Copa Coca-Cola ya 2013 ikazaba ishyigikiwe na ‘Billion reasons to believe in Afurika’.

Hari kandi impungenge zo kuba ubu butumwa buri mu Cyongereza gusa bityo abatakizi ntibubagereho, mu kumara izo mpungenge Reni yavuze ko mu butumwa buzatangwa ku maradiyo na televisiyo buzajya buba buri mu ndimi zitandukanye.

Iki gikorwa kizamara imyaka itatu gifite intego yo gukundisha Afurika abayituye, kandi basangira banazirikana akamaro ka Coca-Cola mu gutsirika icyaka.