Abanyamabanga nshingwabikorwa b’imirenge n’utugari basaga 73 mu karere ka Gasabo basabwe gukangurira abaturage kwitabira ibikorwa by’ iterambere bijyanye na gahunda ya kabiri y’ imbaturabukungu, barwanya imiturire y’akajagari itajyanye n’icyerekezo bakanahinga ubutaka bukigaragara ko ari bunini budahinze muri aka Karere.

Umuyobozi w’Akarere Ndizeye Willy, ageza bimwe mu byavuye mu myanzuro y’ Umwiherero w’abayobozi bakuru ku bayobozi b’Imirenge yo mu Karere ka Gasabo, yababwiye ku butumwa bwo kwihutisha ibikorwa by’ iterambere, abasaba kwihutisha gukemura ibibazo biri mu miturire, kuko hari aho usanga hubakwa bitemewe. Ababwira ko abayobozi b’imidugudu, ab’utugari n’imirenge bazafatirwa muri ayo makosa bazahanwa bikomeye.

Yavuze ko imiturire yo mu kajagari igomba guhagurukirwa, ntirangwe muri ako Karere. Abasaba ko hagomba kwihutishwa gahunda zo gutuza abantu mu midugudu, kuko aho byatangiye muri aka Karere usanga bitanga umusaruro mwiza, kuko byihutisha ibikorwa by’amajyambere birimo amazi, umuriro, imihanda, amashuri n’amavuriro.

Mu buhinzi, nk’uko 80% by’abatuye mu Rwanda ari abahinzi n’aborozi, Ndizeye Willy avuga ko Akarere ayobora nako kagomba gusyira imbaraga mu buhinzi, ati “Mu karere kacu hagaragara ubutaka bunini budahinze, ibice binini n’ibigunda. Hagomba gushyirwa imbaraga muri gahunda zo guhuza ubutaka, ahagomba kujya amatarasi hagaterwa imbuto z’indobanure zizafasha abaturage gukomeza kwiteza imbere.”

Bamwe mu bayobozi bari bitabiriye inama baganira na IGIHE, Mukeshimana Regine yavuze ko iyi myanzuro ije kongera kubakangurira kwihutisha gahunda z’ibikorwa bitandukanye, abona ko hazashyirwa imbaraga mu kumenyekanisha amakuru, kandi bagaharanira gushyira mu bikorwa no gusoza imihigi yabo. Imyanzuro yose bagejejweho igashyirwa mu bikorwa hihutishwa iterambere rirambye ku banyarwanda.

Ibihuru bigomba gukurwaho hagahingwa