Ubuso bugera kuri hegitari 138 ziri mu Mudugudu wa Nyagahinga, Akagari ka Vugangoma, Umurenge wa Macuba mu Karere ka Nyamasheke, bwemejwe ko buzimurirwaho inyubako za Gereza ya Rusizi n’ibikorwa byayo.

Ni no muri urwo rwego kuri uyu wa gatatu tariki ya 14 Ugushyingo 2012 Komiseri Mukuru w’Urwego rw’Igihugu rushinzwe imfungwa n’abagororwa Rwarakabije Paul yasuye ahazimurirwa iyi gereza yari isanzwe mu Murenge wa Kamembe mu Karere ka Rusizi.

Komiseri Rwarakabije yatangaje ko kwimura iyi gereza biri muri gahunda y’ibikorwa remezo bijyanye n’amagereza mu gihugu, ikaba igomba kuva mu mujyi ikubakwa mu cyaro. Hagomba kuba ari ahantu hisanzuye, haboneka n’imirima yo gukoreramo imirimo y’amaboko.

Yakomeje avuga ko kandi mu cyerekezo cy’ibikorwa remezo bijyanye n’amagereza hazubakwa gereza iri ku bipimo mpuzamahanga, kandi ikazitirirwa Akarere yubatsemo bityo ikitwa Gereza ya Nyamasheke.

Abatuye kuri ubu butaka ubuyobozi bw’Akarere bwababujije gushyiramo ibikorwa biramba, kuko bazatangira kubarirwa ibirimo mu minsi itarambiranye.