Umurenge wa Gikomero utangaza ko uzatangiza mu gihe cya vuba gahunda y’ubworozi bw’inkoko za kijyambere zitera amagi mu midugudu yose. Ibi ngo bikazafasha abaturage kubona amafaranga abafasha kwiteza imbere.

Kalisa Jean Sauveur Umunyamabanga Nshingwabikorwa w’Umurenge wa Gikomero atangaza ko biri muri gahunda yo kwigira, bikazafasha umuturage kwiteza imbere mu buzima bwabo bwa buri munsi.

Avuga ko yifuza ko umurenge we ugaragaza iterambere bikanagaragara mu bahatuye, bityo abasaba ko batagomba kugaragara nk’abataba mu Mujyi wa Kigali, ati ”Mugomba gusobanuka, mugashishikarira ibikorwa byose by’ iterambere nk’abatuye mu mujyi wa Kigali”.

Avuga ko nyuma y’ibikorwa by’ubuhinzi bwa kijyambere bw’inyanya muri “Green House”, ubuhinzi mu matarasi y’indinganire hazakurikiraho ubworozi bw’inkoko zitera amagi, avuga ko yarangije kubabonera aho bazajya bayagurisa.

Abatuye muri Uyu murenge batangaza ko ibikorwa bitandukanye by’ubuhinzi n’ubworozi barimo bizabafasha no kugera ku bindi bikorwa by’iterambere birimo amazi n’umuriro bitaragera mu duce twose tw’uyu murenge.