Abaturage bo mu Karere ka Gisagara bibumbiye muri Koperative Abahuje Imbaraga ikorera mu mUrenge wa Mugombwa bagaragaje ko bari mu nzira yo gusezerera ubukene babikesheje amatungo magufi y’ingurube.

Ku itariki 11 Kamena2012 ubwo hakorwaga igikorwa cyo korozwa amatungo magufi y’ingurube aba banyamuryango bemeje ko korozwa aya amatungo ari imwe mu nzira yo gusezerera ubukene bwari bwarabigizeho akarande.

Abanyamuryango b’iyi koperative bagizwe ahanini n’abafite ubwandu bw’agakoko ka SIDA, ndetse n’abandi baturage bari mu cyiciro cy’abatindinyakujya bose hamwe bagera kuri 77. Izi ngurube zakomotse ku nkunga yatanzwe n’ikigega cya Global Fund mu bufatanye n’Urugaga Nyarwanda rw’Abikorera ku giti cyabo PSF (Private Sector Federation) hagamijwe gufasha aba baturage kwikura mu bukene.

Tuganira na Ruzigamanzi Jean Pierre umukozi wa PSF ushinzwe ishyirwa mu bikorwa ry’uyu mushinga, yadutangarije ko uretse iyi koperative Abahuje Imbaraga, bakorana n’izindi koperative zigera kuri 5 ziri mu mirenge itandukanye y’Akarere ka Gisagara ariyo Mugombwa, Muganza, Mukindo, Ndora na Save aho abagenerwabikorwa babo biganjemo abafite ubwandu bwa SIDA ndetse n’abandi bantu bari mu cyiro cy’abatindi babafashwa kwikura mu bukene binyujijwe mu guhabwa amatungo magufi y’ingurube kuko ariyo basanze yabafasha kwikura mu bukene mu gihe cya vuba n’indi mishinga ibyara inyungu mu gihe gito irimo guhinga urutoki rwa kijyambere.

Uretse koperative yo mu Murenge wa Mugombwa, mu Murenge wa Muganza habereye igikorwa nk’iki aho abanyamuryango ba Koperative Humura Munyarwanda basabwe gufata neza amatungo bahawe bityo bikazagirira akamaro Koperative nabo ubwabo muri rusanjye.

Uhagarariye urugaga Nyarwanda rw’abikorera ku giti cyabo mu Karere ka Gisagara, Nyamaswa François yasabye abanyamuryango b’izi koperative guhindura imitekerereze kuko inkunga zitazahoraho, ubu nabo bageze mu rugaga rw’abikorera ku giti cyabo bityo bakarushaho gukora neza no kubyaza umusaruro ufatika imishinga bafashijwe kugeraho.

Biteganyijwe ko inkunga zigenerwa aya makoperative na Global Fund na PSF izahagarikwa mu mwaka utaha wa 2013.