Umuyobozi w’Ikigo cy’igihugu gishinzwe uburezi (REB), John Rutayisire, yatangaje ko iteganya guha akazi abandi barimu 400 bigisha ururimi rw’icyongereza bakava kuri 615 bari bahari bakagera ku 1015.

Kongera umubare w’abigisha icyongereza byatangarijwe mu nama yabaye kuri wa gatanu tariki ya 10 Ugushyingo, ihuje REB n’abarimu 615 bafite umurimo wo gufasha abandi kwiga no kwigisha mu rurimi rw’Icyongereza muri gahunda yiswe “School based mentorship”.

Kongera abo barimu bigisha Icyongereza bizatuma byibuze buri bigo bibiri bizajya bigira umwarimu ubikurikiranira hafi mu rurimi rw’icyongereza, kuko ubusanzwe atariko byari bimeze hose mu gihugu.

Ibigo bikeneye iyi gahunda cyane ni uguhera mu mashuri abanza kugeza muri gahunda y’uburezi bw’ibanze bw’imyaka cumi n’ibiri(12YBE).

Umuyobozi wungirije muri REB ushinzwe Iterambere n’imicungire myiza y’abarimu, Damiyani Ntaganzwa asaba abayobozi b’ibigo by’amashuri kwiga uburyo abarimu bari muri iyi gahunda bakoreshwa, bakabyazwa umusaruro, kuko muri iki gihe mu Rwanda amasomo yose asigaye atangwa mu rurimi rw’icyongereza usibye ayandi masomo y’ikinyarwanda, igifaransa n’igiswahili.

Umwe mu barimu b’abanyarwanda bakora uyu murimo, Kamugisha Jean Marc arishimira imikoranire bagirana na bamwe mu bayobozi b’ibigo by’amashuri kubera ko iyo bahawe gahunda nziza n’ubuyobozi bw’ikigo usanga bafasha abarimu mu buryo bwiza.

Kimwe mu bibazo aba barimu b’aba “mentors” b’abanyamahanga bafite ni ukubona uruhushya rwo gukorera mu Rwanda; nk’uko babisobanuriwe na Jane Murekatete ushinzwe ibikorwa birebana na VISA muri kigo gishinzwe abinjira n’abasohoka.

Murekatete akomeza atangaza ko abaturuka mu Ibihugu byo mu muryango wa Afurika y’Iburasirazuba (EAC) bahabwa uruhushya rw’akazi nta mafaranga batanze, ariko mu gihe bacyererewe kubisaba bagacibwa amande.

Mu barimu 615 bari gukora, 296 ni Abanyarwanda, mu bandi basigaye hakabamo Abagande, Abanyakenya, Abarundi hamwe n’Abanyekongo.