Ku wa gatanu tariki ya 22 Gashyantare 2013 Guverineri w’Intara y’Iburasirazuba Uwamariya Odette yasuye Ibikorwa bitandukanye byagezweho ku bufatanye bw’abaturage n’ubuyobozi mu Murenge wa Kiyombe mu Karere ka Nyagatare, anaganira n’abaturage akemura ibibazo byabo muri gahunda y’ukwezi kw’imiyoborere myiza.

Ubwo Guverineri Uwamariya yageraga mu Murenge wa Kiyombe

Guverineri Uwamariya ari kumwe n’inzego z’umutekano n’Umuyobozi w’Akarere ka Nyagatare Sabiti Fred ku ikubitiro basuye ishuri ry’imyuga riherereye mu Kagari ka Cyondo. Iri shuri ryubatswe ku nkunga y’Intara ya Rhenanie Palatinat, ubu rikaba ryigirwamo n’abanyeshuri 80 biga imyuga y’ubudozi, ubwubatsi no gukora ibijyanye n’amazi.

Muri uyu Murenge kandi Guverineri yatashye ku mugaragaro ishuri ryisumbuye rya Kabare II, ryubatswe n’abaturage muri gahunda y’uburezi bw’ibanze bw’imyaka 12. Umuyobozi w’iri shuri yavuze ko ari ishuri ryitwara neza kuko umwaka ushize ryatsindishije mu bizami bisoza icyiciro cya mbere cy’amashuri yisumbuye ku kigereranyo cya 97%.

Mu biganiro yagiranye n’abaturage nyuma yo gusura ibikorwa bitandukanye by’amajyambere, Guverineri yashimiye abaturage b’uyu Murenge ingufu, ubushake n’ishyaka bagaragaza mu guteza imbere umurenge wabo. Yabashimiye cyane kuba barakomeje gushyira imbaraga nyinshi mu bikorwa bitandukanye byagiye bituma uyu murenge uza ku isonga haba mu Karere ka Nyagatare no ku rwego rw’igihugu, abasaba gukomeza uwo murava bagafatanya n’Ubuyobozi gushyira mu bikorwa ibyo uyu murenge wiyemeje kuzageraho muri uyu mwaka.

Umuyoboi w’umurenge wa Kiyombe Mwumvaneza Emmanuel, yavuze ko kuba barasuwe n’umuyobozi w’Intara bigiye kubatera imbaraga bityo n’ibikorwa bitari byagerwaho neza bigiye kwihutishwa. Ati “Ndahamya ntashidikanya ko kuba mwasuye uyu murenge bigiye gutuma twihutisha ibikorwa twiyemeje nko kurangiza kubaka SACCO, Ibiro by’Utugari, kwitabira gahunda y’ubwisungane mu kwivuza n’ibindi.”

Abanyakiyombe bishimiye ko basuwe babigaragariza mu mbyino

Mu bibazo abaturage ba Kiyombe bagejeje kuri Guverineri bavuze ko ubu bafite ikibazo cy’isoko ry’uduseke, ariko Guverineri yabijeje ko agiye kubakorera ubuvugizi akabahuza n’abashobora kubafasha kubabonera isoko. Ikindi kibazo cyagaragajwe ni ikijyanye n’uko mu tugari tumwe tw’uyu murenge batumva radiyo ntibanashobore kureba televiziyo neza. Guverineri Uwamariya yababwiye ko Leta irimo gushyiraho uburyo buzatuma itumanaho rigera hose mu gihugu, ko nta kabuza bashonje bahishiwe. Umurenge wa Kiyombe uhana imbibi n’Intara y’Amajyaruguru n’Igihugu cya Uganda. Ugizwe n’utugari dutandatu n’imidugudu 67.

Ni inkuru dukesha Eric Muvunyi ushinzwe itangazamakuru mu Ntara y’iburasirazuba