Ubuyobozi bwa Komisiyo y’Igihugu ishinzwe abana buratangaza ko mu mezi 7 ashize hamaze gufungwa ibigo bibiri byarererwagamo impfubyi, bikaba biteganijwe ko ibindi bibiri mu bigo 34 birebwa n’iyo gahunda nabyo bizaba byafunze imiryango mu mezi abiri ari imbere.

Nk’uko biteganyijwe mu 2014 ugomba gusiga abana bose barererwa mu bigo by’impfubyi bagejejwe mu miryango.

N’ubwo hari ikibazo cyo kumenya imiryango yabo bana b’impfubyi, Zaina Nyiramatama, Umunyamabanga Nshingwabikorwa wa Komisiyo y’Igihugu ishinzwe abana yatangarije The New Times ko hari ikizere ko intego nyamukuru igamijwe izagerwaho.

Nyiramatama avuga ko hashyizweho amatsinda muri buri turere ashinzwe gukurikirana icyo gikorwa, yongeraho kandi ko inzego z’Uturere zifasha mu gushishikariza imiryango yabo bana kubitaho no gushakisha indi miryango yaba ifite ubushake bwo kubakira mu muryango.

Nyiramatama avuga ko kugeza ubu amafaranga asaga miliyoni 822 y’amanyarwanda yamaze gutangwa hirya no hino mu turere akaba azakoreshwa mu ngengo y’imali ya 2012-2013.

Igikorwa cyo gufunga ibigo byarererwagamo arererwamo impfubyi kijyanye na gahunda yo guteza imbere uburere bwo mu muryango no kubahiriza inshingano z’umubyeyi ku mwana we.