Kuri uyu wa Gatandatu tariki ya 24/03/2012, ababyeyi, abarezi, ndetse n’abavuga rikumvikana bagera ku ijana, bo muturere twa Nyarugenge na Gicumbi bahuguwe na Imbuto Foundation, kuri politiki nshya y’ubuzima mu mashuri, aho abagera kuri 40 bahuguriwe muri hotel Umubano, naho abandi 60 bagahugurirwa i Gicumbi.

Politiki nshya y’ubuzima mumashuri (School Health Policy) yasobanuriwe abari bitabiriye amahugurwa, ikaba yasobanuwe na Denise Uwera, impuguke ya Minisiteri y’Uburezi mu by’ubuzima n’icyorezo cya SIDA, aho yavuze ko politiki nshya yashyizweho ari iyo gutuma imyigishirize ku by’ubuzima muri rusange n’ubuzima ubwabwo mu mashuri buhinduka.

Yagize ati: “urubyiruko rwinshi ntirubona ubumenyi buhagije cyangwa bunaboneye kubijyanye n’imibereho n’uburyo bwo kwitwaramo. Niyo mpamvu rero kubufatanye bw’impande nyinshi zirebwa nabyo arizo; inzego za leta ababyeyi, abana, ndetse n’abaterankunga bose bagiye bifashishwa mukugirango ino politiki ishyirweho.”

Iyi politiki igizwe n’ibice bibiri aribyo; Gutanga servisi z’ubuzima no kuzamura imibereho myiza mu mashuri, ndetse no Kwigisha ibijyanye n’ubuzima mu mashuri yose mu isomo ryihariye.

Ibi byiciro bibiri nabyo bigabanyije ibindi bitandatu aribyo: Isuku no kwita ku bidukikije, kwita kumirire hagaburirwa abana mumashuri bakanigishwa gutegura indyo yuzuye, Kwirinda indwara no kwigisha uburyo zirindwamo, Servisi zijyanye n’ubuzima bwo mu mutwe aribyo ubujyanama ndetse no kwirinda ibiyobyabwenge, Imyitozo ngororangingo na siporo, hamwe n’ubuzima bw’imyororekere.

Edouard Habimana, umwe mu barezi wahuguwe kubijyanye n’iyi politiki nshya yo kwigisha ibijyanye n’ubuzima cyane cyane ubw’imyororekere, yavuze ko n’ubwo asanzwe yarize ibinyabuzima akaba ari nabyo yigisha bitamworoheye kuba yabasha kwigisha ibijyanye n’ubuzima bw’imyororekere nta nteganyanyigisho afite.

Habimana yabivuze muri aya magambo: “Ubundi niyo mbogamizi duhura nayo, kuba wabasha kwigisha ibintu uko ubyumva nta nteganyanyigisho yabugenewe ntabwo biba bihwitse.”

Umuyobozi wa Imbuto Foundation Radegonde Ndejuru yavuze ko ubuzima bw’imyororekere butigishwa nk’uko bikwiye mu miryango kuko ababyeyi benshi ubu babuze umwanya wo kubana n’abana babo kuburyo batanababonera umwanya wo kubaganiriza, naho abandi ntibabaganirize gusa kuko baba bumva ko abana bize amashuri.

Bimwe mu byo iyi politiki izamara bikaba ari uko izafasha mu gutuma umusaruro mu mashuri uzamuka nk’uko Uwera yabitangaje kuko bizaba byakemuye ikibazo cyo kuba umunyeshuri ahora ahangayikiye ubuzima bwe kandi nta n’ubushobozi buhagije bwo kwiyitaho yari afite.