Nyuma yo gusesengura ibibazo bigaragara mu ngo nyinshi z’Abanyarwanda byiganjemo ubukene n’ihohoterwa rinyuranye,ari irishingiye ku gitsina, irishengura umutima, irishingiye ku mutungo n’iribabaza umubiri, Minisiteri y’Uburinganire n’Iterambere ry’Umuryango yasanze ari ngombwa gutegura imfashanyagisho yafasha abubatse ingo n’abitegura ku rushinga kunoza imibanire yabo.

Minisiteri y’Uburinganire n’Iterambere ry’Umuryango yateguye amahugurwa agenewe abazahugura abandi, akazabera mu Ntara zose z’igihugu ku matariki atandukanye. Amahugurwa akaba yatangiriye mu Mujyi wa Kigali, mu Karere ka Kicukiro.

Nsengimana Cyprien, umwe mu bakoze iyi mfashanyigisho, yatangaje ko kugira ngo abagenewe iyi mfashanyigisho bazayibyaze umusaruro basanze ari ngombwa kubanza guhugura abazahugura abandi, kuva ku rwego rw’Akarere kugera mu muryango ubwawo.

Amahugurwa azaha abazayakurikira ubushobozi bwo gufasha abazahugura abandi kumenya ibikubiye mu mfashanyigisho, kumenya uburyo bukoreshwa mu biganiro bigize imfashanyigisho, no kugira ubumenyi ku nsanganyamatsiko zigize imfashanyigisho

Ikindi amahugurwa azafasha abazahugura abandi gutunganya amahugurwa ku rwego rw’Akarere bahagarariye, no kuyasakaza mu Mirenge, Utugari n’Imidugudu.

Imfashanyigisho ikubiyemo ibintu 10 byose byuzuzanya, bisozwa n’umwanzuro usaba abashakanye kunoza imibanire yabo.

Mu muryango harimo ubukene, kutumvikana ku micungire y’umutungo, kutavugisha ukuri hagati y’abashakanye, ubuharike, ubusambanyi, kurwana kinabaviramo kwicana yasanze ari ngombwa gutegura iyi mfashanyigisho, bityo ikazagira uruhare mu kwibutsa abubatse ndetse n’abitegura ku rushinga uko babana mu mahoro azira umunabi n’umwiryane bya hato na hato.