Mu kwezi kwa Kamena na Nyakanga 2012 bimwe mu bitangazamakuru byavugaga ko bizaba byarafunguye televiziyo mu Rwanda. RURA ivuga ko byatewe n’uko uburyo bwo kuzivana muri « Analogue » bigashyirwa muri « Digital » bwari bugitunganywa.

Abaganiriye na IGIHE batangaza ko bategereje ko televiziyo zagombaga gutangira zitangira ntibabibone. Bavuze ko bari bagifite amatsiko y’uko bihagaze.

Mugisha Emannuel uhagaraiye Inama Nkuru y’Itangazamakuru yabwiye IGIHE ko impamvu televiziyo zagombaga gutangira zitaratangira ari uko hataraboneka ikindi kigo kizafasha ORINFOR gukurikirana imikorere y’aya mateleviziyo (Signal Distribution) mu buryo bwa « Digitalisation ».

Yavuze ko hakirimo gutunganywa gahunda amatereviziyo mashya azakorerara mo “ Digitalisation Systheme”. Yagize ati : ”Twakiriye ibigo bishaka gutangiza televiziyo. Tele 10 yo yagombaga kuba yaratangiye, ni izo mpamvu zabitindije. Mu mpera z’uyu mwaka RURA izaba yarangije gutunganya gahunda zose zijyanye n’igenzura twizeye ko zizatangira”.

Mutabazi ushinzwe ubushakashatsi n’itangazamakuru muri RURA yavuze ko mu mpera z’uyu mwaka televiziyo nshya zizaba zatangiye. Yagize ati: ”Gahunda yo gutangiza za televiziyo izajyana no gukura ibyo twabonaga ku mateleviziyo yacu mu buryo bwa ” Analogue” bigashyirwa mu buryo bwa “Digital”. Ubu ORINFOR yatangiye kugura ibikoresho bizakoreshwa dufitanye inama mu cyumweru gitaha ngo turebe uko iyi gahunda ihagaze”.

Umuyobozi wa Tele 10 Nyagahene Eugene yavuze ko badindijwe n’iyi gahunda yo kuvana amashusho mu buryo bw’analogue agashyirwa mu buryo bwa Digital. Avuga ko biteguye gutangira mu mpero z’uyu mwaka ibibazo byose bijyanye no guhindura aya mashusho mu buryo bwa Digital bwarangiye gukorwa. Ibi ngo bikazafasha abazaba bareba aya mateleviziyo kubona amashusho neza.

Ibigo byagombaga gufungura televiziyo muri uyu mwaka birimo Contact FM, Tele 10, Nation Media Group (Nation Holding RwandaLtd) n’izindi.