Ingabo z’u Rwanda, zitabiriye imyimerezo ya gisirikare ihuriweho n’ibihugu bitandukanye irimo kubera muri Nepal, ikaba yariswe Shanti Prayas-II.

Iyi myitozo ikomeye, ihuririweho n’ibihugu bitandukanye, izamara ibyumweru bibiri igamije kongerera ubumenyi ingabo za Loni zibungabunga amahoro ku Isi, yatangijwe ku mugaragaro na Khil Raj Regmi Umuyobozi Mukuru w’Akanama k’Abaminisitiri gashinzwe amatora muri Nepal.

Iyi myitozo, yatangiye tariki ya 25 Werurwe mu gace ka Panchkhal mu Karere ka Kavrepalanchwok, Khil Raj Regmi, Khil yatangaje ko kurinda uburenganzira bw’abantu no gushyiraho amategeko abarengera ari ngombwa bikaba byose bijyanye no gutsimbataza Demokarasi.

Abasirikare b’u Rwanda 40, bari mu basirikare 804 bahagarariye ibihugu 23, birimo Bangladesh, Cambodia, Canada, Ghana, India, Indonesia, Japan, Jordan, Malaysia, Mongolia, Tajikistan, Thailand, u Rwanda, USA n’u Bwongereza.

Ibihugu 11 gusa, ni byo byemerewe gutanga aya mahugurwa birimo n’u Rwanda, mu byiciro 3 bizakorwa. U Rwanda rugaragara mu bijyanye n’ibiro bitanga imyitozo, no mu cyiciro cy’ishyirwa mu bikorwa ry’aya mahugurwa. Amakuru aturuka aho iyi myitozo irimo kubera, akaba avuga ko u Rwanda rurimo kugaragaza ubushobozi buri hejuru.

Iyi myitozo, yakiriwe n’igisirikare cya Nepal ku bufatanye n’igihugu cya Leta Zunze Ubumwe za Amerika nk’umuterankunga w’iki gikorwa cyo gufasha mu kugarura amahoro, kizarangira tariki ya 7 Mata 2013.