Ubwo basuraga Uturere twa Nyabihu na Rubavu, Minisitiri w’Umutungo Kamere, Stanislas Kamanzi, na Minisitiri w’Ingabo James Kabarebe bashimye ibimaze gukorwa n’Inkeragutabara mu rwego rwo kurengera ibidukikije muri utwo turere.

Uru ruzinduko rwaba ba minisitiri muri utu turere rwabanjirijwe n’igikorwa cyo gutangiza ku mugaragaro gahunda yo gusubiranya ishyamba rya kimeza rya Gishwati, ku bufatanye bwa Minisiteri y’Ibikorwa Remezo, n’umutwe w’Inkeragutabara hakazaterwa ibiti ku buso bugera kuri hegiteri 3,000, nyuma yuko imiryango yari ituriye iryo shyamba yimuwe igatuzwa mu Karere ka Nyabihu na Rubavu.

Abamibisitiri berekwa ibyakozwe n'Inkeragutabara

Mu butumwa batanze nyuma y’igikorwa cyo gutera ibiti ku buso bugera kuri hegitari 12,1, Minisitiri Kamanzi yavuze ko ubu hari gahunda yo kugira u Rwanda igihugu gitohagiye, gitwikiriwe n’amashyamba ariko bikajyana no gukoresha ubutaka neza. Yavuze kandi ko gahunda yo gutera amashyamba itagomba kubangamira izindi gahunda ziriho ahubwo ko hagomba kubaho ubwuzuzanye bigatuma n’ibindi bikorwa bigenda neza.

Abo baminisitiri bombi bashimye uruhare Inkeragutabara zikomeje kugaragaza mu kongera ubuso buteyeho amashyamba hirya no hino mu gihugu, basaba abaturage kugira uruhare mu kuyafata neza kuko aribo ba mbere afitiye akamaro. Minisitiri Kamanzi yagaye abagira uruhare mu bikorwa bibi byo kwangiza amashyamba, asaba inzego z’ibanze gufasha abaturage kurebera hamwe uburyo barushaho gucunga neza ayo mashyamba.

Imvaho Nshya dukesha iyi nkuru ivuga ko ku kibazo kijyanye n’abaturage bateye amashyamba muri Gishwati, Minisitiri Kamanzi yavuze ko ayo mashyamba azabarurwa agahabwa agaciro kayo noneho banyirayo bagahabwa ingurane yayo.

Abo bayobozi kandi bafatanyije n’Inkeragutabara bakora amaterasi y’indinganire ku musozi wa Arusha, mu rwego rwo kurwanya isuri no kongera umusaruro w’ubuhinzi hagamijwe guteza imbere imibereho myiza y’abaturage bimuwe muri Gishwati.

Uruzinduko rwakomereje mu Karere ka Rubavu, aho basuye imirimo imaze gukorwa mu rwego rwo gutunganya Umusozi wa Rubavu hagamijwe kuwugira ahantu nyaburanga.

Muri rusange aba ba Minisitiri bashimye ibimaze kugerwaho, kuko kubera uko imirimo yihutishwa Inkeragutabara zimaze gukora byinshi bikaba binatanga icyizere ko imirimo izarangira mu gihe gito kurusha icyari cyarateganyijwe.

Umusozi wa Rubavu uzunganira ubukerarugendo bwakorerwaga ku Kiyaga cya Kivu, kandi bizanatanga akazi ku baturage batari bake.