Indaya zihagarariye izindi mu Mirenge icumi itandukanye igize akarere ka Gasabo, nyuma y’uko zihuguwe n’Ikigo cy’Urubyiruko cy’i Kabuga ku ikoreshwa ry’agakingirizo, zatangaje ko zishimira ko agakingirizo kazifasha mu kwirinda ibyorezo byinshi mu kazi kazo ka buri munsi.

Aba bakobwa n’abagore icumi bicuruza, ni bamwe muri 76 bahugurirwaga mu minsi itanu ishize mu Kigo cy’Urubyiruko cy’i Kabuga ku bukangurambaga bw’urungano by’umwihariko ku kwirindira ubuzima, dore ko nabo bahita bajya kwigisha bagenzi babo basanzwe bahagarariye.

Mutoniwase Adeline uvuka mu Murenge wa Rusororo uvuga ko akorera umwuga w’uburaya i Remera, ngo nyuma yo kwigishwa, arashimira agakingirizo, ati “Dusanzwe tugakoresha cyane, urugero natanga ni uko mu myaka itanu maze nkora uburaya, si ndabyara umwana n’umwe, si ndarwaramo imitezi n’izindi ndwara zandurira mu mibonano idakingiye, buri gihe iyo bampimye basanga ndi muzima. Nicyo nshimira agakingirizo.”

Abandi bakora uyu mwuga, bavuga ko amahugurwa nk’aya abafasha kwigisha abo bahagarariye bigatuma bagenda bahindura imyitwarire ku kurinda ubuzima bwabo, n’ubwo ngo kureka burundu uyu mwuga bitaborohera.

Mungwarakarama Deo, Umuhuzabikorwa w’Ikigo cy’Urubyiruko cy’i Kabuga, arasobanura kubyo bigisha, ati“Tubafasha mu kubakangurira kwirinda kwandura ku batarandura, kwirinda kwanduza abandi, kuboneza urubyaro, ku ihindagurika ry’imibiri yabo no ku kuyobora ibiganiro nk’abagiye gufasha bagenzi babo guhindira imyitarire binyuze mu biganiro byabo byihariye nk’abakora umwuga umwe.”

Mu murenge wa Rusororo i Kabuga, bahuguwe bari 76, bari barimo abakobwa icumi bicuruza barimo abaturutse i Rusororo, Ndera, Remera, Kinyinya, Gisozi, Gatsata n’ahandi muri Gasabo.