Mu minsi mike ishize ibitangazamakuru bitandukanye byatangaje ko Kaminuza yasabye abanyeshuri gutanga amafaranga 50,000 yiyongera kuyo batanga biyandikisha.

Nyamara Nk’uko Prof. Manasse Mbonye, umuyobozi ushinzwe amasomo muri Kaminuza nkuru y’u Rwanda abivuga mgo aya mafaranga ni kosiyo(Caution) izatangira gutangwa mu mwaka w’amashuri wa 2012-2013. Ni muri urwo rwego Kaminuza ishatse gusobanura byimazeyo imiterere y’iki kibazo kugira ngo abanyeshuri batabyumva basobanukirwe kurushaho, igatanga ingingo zikurikira:

1.Kosiyo ni amafaranga umunyeshuri yishyura mu rwego rwo gushingana ibikoresho bya Kaminuza ashobora kwangiza mu gihe akiri ku ntebe y’ishuri.

2.Mu gihe umunyeshuri asoje amasomo ye bikagaragara ko nta kintu na kimwe yigeze yangiza, asubizwa ayo mafaranga uko yakabaye.

3. Amafaranga ya Kosiyo aratangwa mu mashuri makuru yose ndetse no mu yisumbuye, ibi birazwi ku isi hose. Ahubwo Kaminuza Nkuru y’u Rwanda yari itaragena itangwa ry’aya mafaranga.

4. Inteko y’abayobozi ba Kaminuza mu nama yabo yo ku wa 31 Ugushyingo 2011, yemeje ko buri munyeshuri agomba gutanga amafaranga 50,000 ya kosiyo.

5. Byagenwe ko iki cyemezo kigomba gushyirwa mu bikorwa mu mwaka w’amashuri wa 2012-2013 (ni ukuvuga muri Nzeri 2012).

6.Umuryango w’abanyeshuri biga muri Kaminuza ufite abanyeshuri babiri bahagarariye bagenzi babo barimo Perezida wa NURSU hamwe n’ushinzwe iterambere ry’umugore. Aba bitabira amanama yose y’inteko y’ubuyobozi bwa Kaminuza mu nshingano zabo hakaba harimo kugeza ku bo bahagarariye imyanzuro ibareba.

7. Ibiro bishinzwe kwandika abanyeshuri biherutse kunyuza itangazo ryo kwibutsa abanyeshuri iby’aya mafaranga ku rubuga rwa Kaminuza.

8.Umuyobozi Ushinzwe amasomo muri Kaminuza aherutse kugirana inama n’abayobozi b’umuryango w’abanyeshuri baganira kuri iki kibazo.

9.Mu rwego rwo korohereza abanyeshuri n’ababyeyi gutura umuzigo bikoreye, Kaminuza yahisemo gucamo kabiri imitangirwe y’iyi Kosiyo, aho umunyeshuri azatanga amafaranga 25000 mu ntangiriro z’igihembwe cya mbere andi akazatangwa mu ntangiriro z’igihembwe cya kabiri.

10.Ibi byose umuryango w’abanyeshuri ba Kaminuza (NURSU) warabyemeye. Ngiyo imiterere y’ikibazo cy’amafaranga ateganyirizwa ibyangijwe (caution) muri Kaminuza.