Mu gihe ibikorwa byitiriwe Icyumweru cya Polisi bimaze ibyumweru bigera kuri bibiri bitangiye, kuri uyu wa Gatatu tariki ya 13 Kamena 2012, iki gikorwa cyakomereje mu Karere ka Kicukiro mu Mujyi wa Kigali., aho hanashyizwe ibuye ry’ifatizo ahazubakwa ikigo ’Isange One Stop Center’ cya Polisi ku Karere ka Kicukiro

Iki gikorwa cyatangirijwe ku cyicaro cya Polisi mu Karere ka Kicukiro, hakaba hashyizwe ibuye ry’ifatizo ahazubakwa ikigo Isange One Stop Center cya Polisi ku Karere ka Kicukiro, icyo kigo kizajya cyakira ndetse kinafashe abahuye n’ibibazo by’ihohoterwa rishingiye ku gitsina bo mu Karere ka Kicukiro.

Umuyobozi w’Akarere ka Kicukiro Ndamage Paul Jules yavuze ko icyo kigo kizatwara akayabo ka miliyoni mirongo itatu z’amafaranga y’u Rwanda kikazuzura mu mezi atatu ari imbere.

Ndamage yashyikirije Polisi y’u Rwanda inkunga y’amafaranga miliyoni icumi azafasha kubaka icyo kigo, akaba kandi yarashimye ubufatanye bwiza hagati y’Akarere ayobora na Polisi mu kurwanya ibyaha ndetse no gufatanya mu bikorwa binyuranye by’iterambere.

Mu ijambo rye, Umuyobozi Mukuru wa Polisi y’u Rwanda IGP Emmanuel K. Gasana, yibukije abaturage Bo ku Kicukiro, ko muri iki gihe tugezemo, umutekano utagicungirwa mu guhashya ibyaha gusa, ahubwo ko ubu usigaye unacungirwa mu gukora ibikorwa by’amajyambere, nko kurwanya ubukene, kurwanya ihohoterwa rishingiye ku gitsina, ibyo byose bigakorwa Polisi ifatanyije n’abaturage.

IGP Emmanuel K. Gasana yakomeje avuga ko iki cyumweru cya Polisi nacyo kiri mu rwego rwo gukumira ibyaha, asoza asaba abaturage cyane cyane urubyiruko kwirinda ibiyobyabwenge n’ibisindisha, anabamenyesha abari aho ko Polisi y’u Rwanda itazahwema gukora uko ishoboye ngo abaturage b’u Rwanda batere imbere.

Umuyobozi w’Umujyi wa Kigali, Ndayisaba Fidèle wari witabiriye iki gikorwa, yashimiye ubuyobozi bw’Akarere ka Kicukiro ku ngamba bwafashe zo gukumira no kurwanya ibyaha, cyane cyane guca ibiyobyabwenge n’ibisindisha mu rubyiruko.

Ndayisaba yakomeje asaba abaturage bo mu Karere ka Kicukiro kwirinda ibiyobyabwenge n’ibisindisha kuko bigira ingaruka mbi ku mibereho yabo, ndetse no ku iterambere mu by’ubukungu kuko ubinyoye ahatakariza amafaranga atari make.

Umuyobozi w’Umujyi wa Kigali nawe yasabye abaturage gukomeza gufatanya n’inzego zishinzwe umutekano kuko ariwo shingiro rya byose.

Iki gikorwa cyaranzwe kandi no gutanga ubwisungane mu kwivuza ku baturage 100 batishoboye ndetse n’inzitiramubu 100 zo kubarinda indwara ya malariya, byose bikaba ari inkunga ya Polisi yageneye abaturage.

Ibindi bikorwa byakozwe na Polisi ndetse n’abaturage b’Akarere ka Kicukiro birimo umuganda wo kubaka ikiraro gihuza imirenge ya Niboye na Kanombe, bityo abava n’abajya muri iyo mirenge bakaba bazajya babasha kugenderana nta kibazo.

Foto:RNP