Bamwe mu banyeshuri biga mu ishuri rikuru nderabarezi rya Kigali (KIE), barasaba abayobozi babo bashya kugira icyo bahindura ku mikorere isanzwe igaragara mu bayobozi b’ishyirahamwe ry’abanyeshuri bahiga(SUKIE).

Felix na bagenzi be baragira bati: ”Komite igiyeho yagakwiye kwita kukumva ibibazo by’abanyeshuri no kubishyikiriza abashinzwe kubikemura, bakikuramo no gutinya abayobozi cyangwa se bakajya badusabira inama ziduhuza n’abayobozi ba KIE, tukibariza ibibazo kuko akenshi ntabyo batubariza”.

Undi munyeshuri w’umukobwa waganiriye na IGIHE, we yatangaje ko bagakwiye kwita ku kibazo cy’ubuzima ngo mu gihe abanyeshuri barwaye nijoro ngo usanga ahanini hahamagarwa Croix Rouge, kurusha uko biyambaza SUKIE, yanenze n’imbaraga zikoreshwa mu mikino.

Mu gushaka ibisubizo by’ibi bibazo IGIHE yegereye bamwe mu bayobozi batowe n’abacyuye igihe ngo twumve icyo bateganya kubikoraho.

Murwanashyaka Sam ni Pererzida w’abanyeshuri ucyuye igihe, yatangaje ko byose bitagenze neza ariko agira ati: "Rimwe na rimwe iyo ibibazo bitinze gukemuka, abanyeshuri birengagiza ko ibintu bigira inzira bigomba gucamo.

Mu kiganiro yagiranye na IGIHE, Bashayija David, umuyobozi mushya w’abanyeshuri muri KIE yatangaje ko mu byo azashyira imbere muri manda ye azabanisha neza abanyeshuri na SUKIE bityo bakiyumva mu muryango wabo, kandi ngo ubuyobozi bwe buzagendera ku byifuzo by’abanyeshuri bagenzi be. Ikindi kandi azakangurira abo bagiye gufatanya kwita no kumenyekanisha inshingano ze ngo abanyeshuri bamenye neza aho ibibazo byabo bikemukira.

Ushinzwe imibererho myiza y’abanyeshuri Gasheja Christophe yagize icyo avuga ku kibazo cy’ubuzima. Yagize ati: "Umwaka ushize hari ikibazo cyo kutagira umuganga w’ijoro no mu minsi itari iy’akazi ariko hari uwasinyishijwe kontaro, naho Croix Rouge yo ubusanzwe nibo bayihamagarira, ariko abanyeshuri nabo bajya bibeshya bakanyuza ibibazo aho bitanyuzwa."

Siporo n’imyidagaduro biri mu bibazo benshi mu banyeshuri bafite, Kayitakire Gustave yabwiye IGIHE ko bagifite ibibazo by’ibibuga ndetse n’abanyeshuri batita ku mikino y’ikigo kubera gushaka imiberereho mu makipe yo hanze. Ariko yanatunze agatoki ubuyobozi bwa KIE butagiha abakinnyi ibyangombwa bituma bitabira imikino, naho ikigendanye n’imyidagaduro cyo ngo gutora nyampinga byatumye ingengo y’imari bari baragenewe ishiriramo byinshi nk’ibitaramo biradindira.