Kuri uyu wa Gatatu tariki ya 12 Nzeri 2012, i Nyamirambo mu kigo cya Mutagatifu Andereya (St. Andre), Umutyango Imbuto Foundation wahurije hamwe abanyeshuri bari baturutse mu bigo by’amashuri bitandatu, aho bigishwaga ku myororokere y’urubyiruko no ku ukwifatira ibyemezo.

Muri College St. Andre iherereye mu kare#re ka Nyarugenge, hari hahuriwe ibigo bitandatu by’amashuri yisumbuye byari byahurijwe hamwe aribyo FAWE Girls School Academy, Green Hills Academy, College St. Andre, Lycee Notre Dame de Citeaux, Groupe Scolaire Notre Damme de Laurde Byimana na Petit Seminaire Ndera.

Aba bana bahuriye muri gahunda imwe ishinzwe kubaka ubushobozi bw’urubyiruko, bigishwa kugira ngo bazakure ari urubyiruko ruzi kwivugira, ruzanavamo umuyobozi w’ejo hazaza.

Ingabire Assoumpta Ushinzwe Ishami ry’Imibereho myiza n’Iterambere mu Imbuto Foundation, avuga ko ibi bakorewe basanzwe babikorerwa rimwe mu kwezi mu mashuri yabo.

Urubyiruko rwishyize hamwe rwiyemeje kwiteza imbere, kuri ubu ruri mu mirimo narwo rwari rwahurijwe hamwe n’uru rukiri mu mashuri kugira ngo basangire ubunararibonye ku mpande zombi.

Iby’ingenzi byibandwaho mu kubigisha, harimo kubaganiriza mu kumenya kwifatira ibyemezo no kugira guhunda mu buzima, kwigishwa ku myororokere y’urubyiruko n’ibindi bibategurira imbere heza.

Ni ku nshuro ya kabiri bahuriye hamwe n’ubwo buri kwezi abana biga mu kigo kimwe bahurira hamwe mu kigo cyabo bakaganira.

Habinshuti Jonathan wiga muri St. Andre mu mwaka wa 6 agira ati “ njyewe nabayemo n’umwaka ushize, iyi gahunda yaramfashije cyane. Ubwa mbere batwigishije uburyo ushobora kwihangira imirimo n’uko wakiteza imbere.

Urubyiruko rwari rurimo guhugurwa

Hari igihe umuntu yiga yumva ko azakora ibinjyanye n’icyo yize, yarangiza bigahinduka. Noneho ibi turimo kwigira hano bikagira umumaro mu buzima, ukiteza imbere”.
Akomeza avuga ko byanamwigishije uko yafasha urubyiruko rugenzi rwe, by’umwihariko urutarize rwiganjemo urunywa ibiyobyabwenge.