Bamwe mu bagore batuye mu Mudugudu wa Buranga, mu Kagari ka Kibagabaga, mu Murenge wa Kimironko mu Karere ka Gasabo, baratakamba basaba ubuvugizi bwihutirwa batarahitanwa n’abagabo babo bakunze gutaha basinze bigakurura amakimbirane mu ngo.

Ibi byose bituruka ku makimbirane akunze kugaragara muri uyu Mudugudu arangwa n’impuruza z’abagore baba bakubiswe n’abagabo babo, dore ko ngo bamwe mu bagabo badahwema no kumenyesha abagore babo ko mu minsi iri imbere bazabica.

Nirere Donatha uherutse gukimbirana n’umugabo we mu ijoro ryo ku wa 29 Ugushyingo 2012, ati “Naje mvuye ku isoko nsanga umugabo yasinze arambwira ngo mfate inzira njye kuryama, mubwira ko ntaryama abana baburaye aratangira arantuka.”

Akomeza avuga ati “Kubera ko yigeze kunkubita inyundo mu mutwe, nakoze ku mufuka w’ipantaro ye numva harimo ikintu ndebye nsanga harimo icyuma. Namubajije icyo agiye kugikoresha, nkikuramo ndakibika arongera amfatira umwana mu ijoso ntahari numva ararize, aza aje kunkubita. Nari mfite ijerekani mu ijosi ndayimutera, maze kuyimukubita mpita njya kureba abanyerondo ngo badukize kuko numvaga ashobora kunyirenza baraza baramukubita.”

Umugabo we witwa Sinjyebarikureka Fidele, avuga ko yari afite icyuma asanzwe akatisha inkweto kuko ari umukorodoniye, ngo ntiyagitahanye ku bushake kuko ngo yakibagiriwe mu mufuka nyuma umugore we akakimusangana. Anavuga ko ngo umugore we amutesha umutwe.

Undi mugore utaradutangarije amazina ye ubarizwa muri uyu mudugudu, na we ati “Ni inshuro nyinshi umugabo wanjye ahora ambwira ngo azanyica. Kandi bituruka ku nzoga aba yanyoye agataha nk’udafite ubwenge bigakurura kurwana.” Uyu mugore avuga ko ikibazo yagishyikirije abayobozi.

Mupende, Umuyobozi w’Umudugudu wa Buranga, ati “Abatuye muri uyu Mudugudu ni abafata ibiyobyabwenge. Igihe cyose mu ngo nyinshi usanga ari imirwano, hahora hatangwa raporo z’ibiyobyabwenge bicururizwa mu mazu yo muri aka gace rwihishwa kandi iyo abagabo bamaze kunywa izo nzoga nta kindi kibaho uretse kurwana n’abagore babo. Hari n’umuturage uherutse kumenyesha ko abwirwa n’umugabo we ko azamwica. Turimo kubikurikira.”

Abandi baturage bo muri uyu mudugudu bavuga ko hari umugabo uherutse gutema umugore we biturutse ku makimbirane baterwa n’ibi biyobyabwenge.