Koperative Umwalimu Sacco yashyizweho igamije kuzamura imibereho ya mwalimu, kubatoza gukoresha inguzanyo no kwibumbira mu makoperative mu rwego rwo kunganira umushahara bahabwa no gukomeza kwiteza imbere nk’abandi banyarwanda bose.

Iyo uganiriye na bamwe mu banyamuryango ba Koperative Umwalimu Sacco bo mu karere ka Karongi, dore ko igizwe n’abarimu bo mu mashuri abanza n’ayisumbuye, bavuga ko kubona inguzanyo muri iyi koperative bitoroshye, kuko basabwa ingwate, bityo abenshi ntibashobore kuyibona. Ibyo ngo bituma basaba avansi ku mushahara, aho usanga ari intica ntikize, kuyakorera umushinga ubyara inyungu bikaba bitoroha.

Bavuga ko iyo basabye avansi ku mushahara idashobora kubakemurira byibuze ibibazo bike baba basanganywe, bagatangira gukurwaho amafaranga yayo, noneho imibereho igasubira inyuma kurusha uko yari ihagaze. Ibyo byose bigaterwa n’uko basaba inguzanyo badashobora kubyaza umusaruro, ahubwo bakayikemuza ikibazo kimwe na cyo kitunguka, bityo batangira kubakuraho ayo mafaranga y’inguzanyo, ibibazo by’imibereho bikiyongera kurushaho.

Bwana Mulindankiko Michel, umuyobozi w’uburezi mu karere ka Karongi yasobanuriye ko Sacco yatekerejweho nk’igisubizo cy’abarezi, ariko akaba asanga bamwe bayifata nk’ikibazo, bitewe n’imyumvire bafite mu gusaba inguzanyo. Yanenze abasaba inguzanyo cyangwa avansi ku mushahara bakayishyuramo bakayikemuza ibibazo aho kuyibyaza umusaruro mu buryo bwunguka kandi bw’ako kanya.

Yatanze urugero rw’abarezi bagiye kwiga za kaminuza n’amashuri makuru birihira. Abo ngo hari ubwo bafata inguzanyo cyangwa se avansi ku mushahara, bakayitangaho amafaranga y’ishuri muri kaminuza cyangwa se amashuri makuru bigamo. Kuba ayo mafaranga baba bayakoresheje mu bintu bidahita bibyara inyugu ubwo nyine, bituma bakomeza kubaho nabi kurushaho, kuko batangira gukurwa ku mushahara amafaranga y’ubwishyu buri kwezi, bityo bagatangira kumva ko koperative yabo ntacyo ibamariye.

Bwana Mulindankiko rero asanga abarimu bakwiye kumenya kurushaho uburyo bwiza bwo gukoresha inguzanyo, bakayishora mu mishinga yunguka by’ako kanya, aho kuyishora mu mishinga yunguka nyuma y’igihe kirekire. Arasanga abarezi bakwiye gufata inguzanyo bakayishora mu mishinga ibyara inyungu, bityo yamishinga igashobora kwishyura ya nguzanyo bafashe, ikanabafasha kwishyura n’amafaranga y’ishuri baba bakeneye kugira ngo bige ubwabo cyangwa se ngo bigishe abana babo.

Koperative Umwalimu Sacco yabereye bamwe igisubizo
N’ubwo bamwe binubira ibijyanye n’uburyo gutanga inguzanyo muri Koperative Umwalimu Sacco, abandi bo basanga yarababereye igisubizo kuko yabafashije kwiteza imbere bakivana mu bukene.

Uwitwa Twagirayezu Emmanuel, ni umwe mu bashoboye kwihangira umurimo akoresheje inguzanyo yahawe na Koperative Umwalimu Sacco, nk’uko bitangazwa na bwana Mulindankiko Michel, mu rwego rwo kugaragariza abandi barezi ko inguzanyo iyo ikoreshejwe neza mu bikorwa bibyara inyungu, nta mpamvu itafasha nyirayo kwiteza imbere. Yavuze ko inguzanyo yahawe uyu murezi yamufashije kugura imodoka yo mu bwoko bwa Fuso, kuri ubu ikaba imwinjiriza biturutse mu gutwara imizigo, imicanga, amabuye n’amatafari byo kubaka. Yavuze ko uyu murezi akomeje akazi ke k’uburezi, ariko akaba akomeza gukurikirana iby’umushinga we.

Bwana Mulindankiko asanga uyu murezi akwiye kubera abandi urugero mu gukoresha inguzanyo, n’abandi bakareberaho. Bwana Mulindankiko we yemera ko kuba Koperative Umwalimu Sacco isaba ingwate abanyamuryango mugatanga inguzanyo, ari ngombwa kuko nta mafaranga yakwiye gusohoka nta ngwate kuko nta n’icyizere cyaba gihari ko azishyurwa. Asanga rero ukeneye inguzanyo itari avansi ku mushahara yakwiye kugaragaza ingwate, bityo akabona kuyihabwa.

Kuba bamwe bitwaza ko bigoye kubona inguzanyo kuko abo bashakanye batabakundira gutanga imitungo basangiyeho ingwate, abona n’ubundi biba bituruka ku bwumvikane buke buba busanzwe hagati yabo, kuko atumva uburyo umushinga waba barawumvikanyeho kandi uzabafasha kuzamura imibereho yabo, ngo umugore abe yakwanga ko umugabo atanga ingwate kugira ngo abone iyo nguzanyo cyangwa se umugabo akaba yakwangira umugore we gutanga ingwate kandi bazi neza ko izabagarukira nyuma yo kwishyura Koperative kandi ikabafasha kwiteza imbere.

Abandi barezi bashoboye kwiteza imbere babikesha koperative Umwalimu Sacco ni abashoboye kwibumbira muri koperative, bakaba ari abarezi bo mu Rwunge rw’amashuri rwa Musango, riherereye mu Kagali Gasenyi ho mu Murenge wa Rwankuba. Aba nabo ngo bashoboye kwigurira imodoka kimwe na mugenzi wabo uvugwa haruguru, ubu nabo bakaba bakomeje kwiteza imbere babifatanyije n’umurimo wabo basanganywe wo kurera. Asanga rero aba barezi bararebye kure, ari na cyo ashishikariza abandi barezi, kurenga igitekerezo cyo gusaba avansi ku mushahara, ahubwo bagahagurikira gufata inguzanyo ifatika ibafasha kwiteza imbere.

Imbogamizi y’umwanya ni kimwe mu bibaca intege
Abarezi bashoboye kuganira n’Imvaho Nshya, basanga gukurikirana imishinga yabo bitaborohera bitewe n’uko batagira umwanya. Icyo gihe rero benshi bagacika intege kuko babona bashobora gutangira umushinga, ukabura gikurikirana bityo ukadindira cyangwa ugahomba. Ibyo babihera ku masaha bakora mu cyumweru, aho bavuga ko ari menshi, kandi bakaba nta munsi w’akaruhuko bahabwa mu minsi y’imibyizi nk’uko byabagaho mbere.

Bavuga ko iyo ari indi mbogamizi ibabuza gufata inguzanyo ngo bazishore mu mishinga, kubera ko bashobora guhomba kandi basabwa kwishyura. Bavuga ko batayobewe ko abantu batari bake bashoboye kwiteza imbere babifashijwemo n’inguzanyo, kandi na bo bakaba bajijutse ku buryo bazi neza akamaro ko gusaba inguzanyo no kuyikoresha. Gusa ngo bakomwa mu nkokora n’amategeko agenga itangwa ry’inguzanyo ndetse n’umwanya wo gukurikirana ibikorwa by’imishinga yabo.

Barasaba rero ko ibyo byose byazajya bitekerezwaho mbere yo gushishikariza abarezi gufata inguzanyo no kuyikoresha. Barifuza ko amabwiriza yo gutanga ingwate ku waka inguzanyo yanozwa kandi akoroshwa, bityo bagashobora kubona uburyo bwo kuzifata no kuzikoresha. Barifuza ko hazongera hagashyirwaho umunsi w’akaruhuko kuri buri mwarimu nk’uko byabagaho mbere, bityo bashoboye no gukora imishinga bakabona uko bayikurikirana, ikabafasha kwiteza imbere.

Imvaho Nshya