Ku nshuro ya gatatu, imwe muri za kaminuza zigenga mu Buhinde, Amity University , tariki ya 14 Ukuboza uyu mwaka yatanze impamyabumenyi ku banyeshuri 102 barangirije amasomo yabo mu ishuri rikuru nderabarezi rya Kigali, mu byiciro bitandukanye, muri gahunda y’inyigisho z’ Iyakure zifashisha ikoranabuhanga.

Muri aba banyeshuri harimo abahawe impamyabumenyi zo ku rwego rwa Masters mu by’ubukungu, ubucuruzi mpuzamahanga n’abahawe izo ku rwego rwa Bachelor mu by’ikoranabuhanga n’Ishoramari.

Uyu muhango wabereye mu Buhinde wari ukurikiranwe mu buryo bw’ikoranabuhanga mu bihugu bigera kuri 20 byo muri Afurika byari bifite abanyeshuri muri gahunda y’IyaKure (e-learning).

Uwashinze Amity Group akaba ari na we Perezida wayo Dr. Ashok K. Chouham, mu butumwa yatanze muri uyu muhango yavuze ko ibihugu bya Afurika na byo byifitemo ubushobozi bwo guhatana n’ibindi, anakangurira abahawe impamyabumenyi kubyaza umusaruro ubumenyi bahawe.

Umuyobozi wungirije ushinzwe amasomo muri KIE Dr. Andre Muhirwa, yavuze ko KIE yishimira ubufatanye bwa Afurika n’u Buhinde by’umwihariko Amity University, aho serivisi z’uburezi zitangwa hakoreshejwe ikoranabuhanga binyuze mu mushinga uhuza ibihugu bya Afurika wiswe Pan Africa e-Network project.

Bwanakweli Chantal, ni umwe mu bahawe impamyabumenyi. Ati “nyuma y’ibyo twagezeho twishimira isi iradutegereje, tugiye gutangira urugamba rwo kuyigira nziza dukoresha ubumenyi twungutse.”

Amity itanga uburezi mpuzamahanga kuva ku rwego rw’amashuri y’incuke kugera kuri PhD. Ifite ibigo byinshi by’amashuri makuru, Imiryango, Amahuriro n’ibindi. Kuri ubu imaze kugira amashami mu bihugu byo ku isi hose.