Nyuma y’aho urubanza rwa Ingabire rwari gusomwa ku itariki ya 29 Kamena 2012, rukimurirwa kuri uyu wa Gatanu tariki ya 7 Nzeri 2012, kuri uyu munsi nabwo isomwa ryasubitswe ryimurirwa tariki ya 19 Ukwakira 2012.

Mu gutangaza impamvu z’isubikwa ry’urubanza Inteko y’Abacamanza yavuzeko kubera ikirego Ingabire yagejeje ku Rukiko rw’Ikirenga, asaba ko ingingo z’itegeko rihana ingengabitekerezo ya jenoside zavanwaho kuko ngo zinyuranyije n’Itegeko Nshinga, iki kirego kikaba kitarafatitwa umwanzuro, ibi ariyo mbogamizi yatumye isubikwa ry’urubanza riba kuri uyu wa Gatanu.

Ubu urubanza ruzasomwa nyuma y’aho ku itariki ya 5 Ukwakira Urukiko rw’Ikirenta ruzaba rwamaze gufata umwanzuro kuri icyo kirego cya Ingabire, gisaba guhindura ingingo z’itegeko rihana ingangabitekerezo.

Ingabire umaze imyaka isaga ibiri afunzwe aregwa ibyaha birimo gutera inkunga umutwe w’iterabwoba no gushishikariza abandi kurikora, gutegura ibikorwa byo guhungabanya umutekano w’igihugu, n’amacakubiri.