Mu Ngoro y’Inteko Nshingamategeko kuri uyu wa Kane tariki ya 26 Nyakanaga, hateraniye inama y’iminsi ibiri, yateguwe n’ihuriro ry’abagore bakora mu Nteko Ishinga Amategeko (FFRP), ifatanije n’Ishyirahamwe Mpuzanteko ku Isi (IPU), ikaba yiga k’ukumenya iby’ingenzi byashingirwaho ngo hemezwe ko inteko yubahiriza ihame ry’uburinganire.

Nk’uko byatangajwe na Depite Mukarugema Alphonsine ukuriye (FFRP), ngo igitekerezo cyaturutse ku cyegeranyo cyiswe Inteko ikurikiza ihame ry’uburinganire (Parlement Sensible au Genre), cyasohotse mu mwaka wa 2011, gikozwe na (IPU).

Iki cyegeranyo kibazaga ahanini n’iba umubare munini mu nteko ariwo washingirwaho ngo bemeze ko Inteko Ishinga Amategeko yubaha ihame ry’Uburinganire.

Mu bitekerezo byatanzwe n’abadepite ku kibazo cyatanzwe Zeina ukora mu ishyirahamwe mpuzamahanga ry’Inteko Zishinga Amategeko, kibaza ibyagakwiye kugenderwaho birenze umubare munini w’abagore ngo hemezwe uburinganire, benshi bagaragaje ko n’umubare ufite icyo ugaragaza, ariko batanga ibindi byinshi byagakwiye gukurikizwa.

Muri ibyo byatanzwe n’abadepite harimo kwakira ibitekerezo by’abagize inteko hadashingiwe ku bitsina, ubushobozi bw’inteko mu guteza imbere uburinganire, guha agaciro imiterere karemano y’umugore ndetse no kumworohereza mubyo ategekwa n’imiterere y’umubiri w’umugore, gutora amategeko hashingiwe k’uburinganire, guharanira ibiteza imbere abagore n’abagabo, kubaha ibyo abagore n’abagabo bagombwa, kugenzura uburinganire mu nteko no mu makomisiyo ashamikiyeho imikorere y’inteko, kuba inteko ishinga amategeko mu gihugu runaka hari icyo ikora mu kumvikanisha umuco w’uburinganire yaba mu mategeko cyangwa mu yindi mirimo yayo ndetse na politiki y’igihugu.

Ibindi bisa n’ibitandukanye n’ibyo abantu bajya batekereza ku buringanire, aho benshi bafata uburinganire nk’ubushingiye ku bitsina. Umwe mu bagore bo nteko Ishinga Amategeko yavuze ko kugira umubare mwinshi w’abagore cyangwa uw’abagabo bidafite agaciro ahubwo avuga ko uburinganire bwagaragarira no mu kwita ku batitabwaho cyane. Aha yatanze urugero rw’abafite ubumuga ndetse n’abandi badakunze gushyirwa mu nteko aribo urubyiruko.

Iyi nama ibaye mu gihe u Rwanda ruza ku isonga m’ukugira umubare mwinshi w’abagore mu nteko.

Gusa abandi badepite bagiye berekana ingero nyinshi zigaragaza uburyo inteko y’u Rwanda iteza imbere uburinganire ndetse bimwe bigasa n’ibyo benshi muri iyi nama batanze nk’ibitekerezo. Ibi biramutse bigendeweho umuntu akaba yakweza ko u Rwanda rushobora no gutwara ikindi gikombe nk’igihugu gifite inteko yubaha ihame ry’uburinganire.