Intumwa ziturutse mu bwami bwa Lesotho zirangajwe imbere n’intumwa ya Minisitiri w’Intebe ari yo Minisitiri w’ubutegetsi bw’Igihugu muri Lesotho Mothetjoa Metsing, zatangiye uruzinduko rw’icyumweru rwo kuzenguruka u Rwanda ziga uko ubuyobozi bwegereye abaturage.

Iri tsinda ririmo intumwa 15 ryaje ku ntego zo guhana ubunararibonye hashingiwe ku buyobozi bwegereye abaturage, ku mabwiriza arebana n’imisoro n’imari, ku mikorere y’ubutegetsi bw’Igihugu no ku byibandwaho ku nkunga z’ubutegetsi bw’igihugu.

Intumwa ya Minisitiri w’Intebe wa Lesotho, Metsing yagize ati “Twemera ko dushobora kuba magirirane bikomotse ku kwigiranaho ku bihugu bya Afurika. Tuzi neza ko u Rwanda ari kimwe mu bihugu bya Afurika byamaze guteza imbere ubuyobozi bwegereye abaturage, aho runakomeza gushimangira iyi gahunda; ni cyo cyatumye tuza kurwigiraho.”

Yasobanuye ko baje kwigira ku Rwanda kuko rwateye intambwe igaragara mu miyoborere no kwegereza ubuyobozi abaturage, Ati “U Rwanda ruri ku mwanya mwiza mu kugaragaza umusaruro w’icungamutungo kandi na Leta ya Lesotho irashaka kuza ku mwanya mwiza mu icungamutungo ryayo.”

Minisitiri w’Ubutegetsi bw’Igihugu mu Rwanda James Musoni yishimiye kuba Lesotho yarahisemo u Rwanda nk’aho yakwigira, ati “Nk’igihugu cya Afurika ni byiza kuko dufite byinshi tugomba gusangira twembi dushyize hamwe.”

Minisitiri Musoni yakomeje abaha ikaze mu Rwanda, banahana impano ku mpande zombi.

Mu nzego izi ntumwa zizasura harimo Minisiteri zitandukanye, Ibigo bya Leta n’izindi nzego zegerejwe abaturage harimo uturere n’Umujyi wa Kigali. Bazasura n’Urwibutso rwa Jenoside rwa Gisozi mu karere ka Gasabo, hamwe n’ahandi hantu hatandukanye.