Minisiteri ishinzwe ibikorwa by’Umuryango wa Afurika y’Uburasirazuba (MINEAC) yatangije gahunda yo gushishikariza abanyeshuri biga mu mashuri yisumbuye, gusobanukirwa ibikorwa by’Umuryango wa Afurika y’Uburasirazuba binyuze muri Clubs ziswe “EAC Integration” no mu marushanwa.

Salafina Flavia Umuyobozi ushinzwe itumanaho, uburezi n’isakazamakuru muri Minisiteri ishinzwe ibikorwa by’Umuryango wa Afurika y’Uburasirazuba, yatangaje ko ibikorwa binyuze muri Club z’abanyeshuri bibafasha gusangiza urubyiruko amahirwe ari mu kwihuza kw’ibihugu, inyungu mu burezi, mu bucuruzi, mu ishoramari, ku isoko rusange n’ibindi.

Yavuze ko bateguye amarushanwa y’ibiganiro mpaka n’ibibazo by’ubumenyi rusange bishingiye ku kumenya iby’Umuryango wa Afurika y’Uburasirazuba no gukorerara hamwe kw’ibihugu. Ayo marushanwa azahuza ibigo 60 byatoranyijwe mu gihugu hose, buri karere kakaba karatoranyijwemo ibigo bibiri.

Kuva ku itariki ya 4 kugera ku ya 14 Werurwe 2013 hazaba hakorwa ibiganiro bifasha abanyeshuri kumenya Umuryango w’ibihugu bya Afurika y’Uburasirazuba, hanashingwa Clubs za EAC Integaration aho zitari.

Ku ya 4 Werurwe ibiganiro nk’ibi byabereye mu ishuri rya Lycée de Kigali, ES Kagarama, FAWE Girls School yo mu mujyi wa Kigali na Kiziguro Secondary School yo mu karere ka Gatsibo.

Bamwe mu banyeshuri ba Lycée de Kigali batangaza ko bizabafasha gusobanukirwa ku gukoresha ifaranga mu bihugu bigize EAC, bo babonaga ko bishobora kuba imbogamizi mu gihe hari abafite ifaranga riri hasi kurusha abandi.

Tuyusenge Victor na Uwase Nadia biga muri Lycée de Kigali, bavuze ko club izabafasha gusobanukirwa kurushaho ibijyanye na gahunda z’Umuryango wa Afurika y’Uburasirazuba bityo ubwo bumenyi bazabusangize abandi.

Amarushanwa ku biganiro mpaka n’ibibazo ku bumenyi rusange ku birebana n’Umuryango wa Afurika y’Uburasirazuba biteganyijwe ko azakorwa muri Kamena 2013.