Inama y’Abaminisitiri yemeje ko inshingano yo kureberera amashuri y’abaforomo, abaforomokazi n’ababyaza, izajya muri Minisiteri y’Uburezi.

Ibi byemejwe mu nama y’Abaminisitiri yateranye kuri uyu wa Kane tariki ya 21 Werurwe 2013, iyobowe na Minisitiri w’Intebe Dr Pierre Damien Habumuremyi.

Ubwo ku itariki ya 15 Gahyantare 2013 Minisitiri w’Intebe Dr Habumuremyi Pierre Damien yagezaga ku Banyarwanda ibyagezweho mu gihembwe gishize n’ibizakorwa muri iki, yatangaje ko Minisiteri y’Ubuzima igomba guharira imirimo yose y’Uburezi Minisiteri y’uburezi, nyuma y’uko hari aho byari byaragaragaye ko Minisiteri y’Ubuzima yafashe inshingano z’uburezi.

Mu Rwanda amashuri agengwa na Minisiteri y’Uburezi, hakaba n’andi yagengwaga na Minisiteri y’Ubuzima y’abaforomo, abaforomokazi n’ababyaza ya Rwamagana, Kibungo, Nyagatare, Byumba na Kabgayi.

Minisiteri y’ubuzima ayo mashuri yari yarayafashe nk’ayayo, Minisiteri y’uburezi isa nk’aho nta nshingano iyafiteho. Ibibazo bikaba byaravukiye ahanini ku ishuri ry’ubuvuzi rya ISPG Gitwe, aho Minisiteri zombi zitumvikanaga ku ikorwa ry’ibizamini, bigatuma abana bamwe batabikora bavuga ko babitungujwe bitari muri gahunda.

Icyo gihe Minisitiri w’Intebe yasobanuye ko Minisiteri y’Uburezi ari yo ishinzwe imyigishirize, ibizamini, porogaramu no gutanga impamyabumenyi kuko ari yo ifite impuguke zabyo na ho Minisiteri y’Ubuzima ikajya itanga inama gusa.