Minisitire w’Intebe Dr. Habumuremyi Pierre Damien yasuye Ikompanyi ya Rwandair Express ku kibuga cy’indege mpuzamahanga cya Kanombe asobanurirwa imikorere yayo, atemberezwa bimwe mu bice bigize ikibuga cy’indege, asaba abakuriye iyi Kompayi gushyira imbaraga mubyo yeretswe bizakorwa mu gihe kiri imbere.

Nk’uko asanzwe asura ibigo bitandukanye bikorera mu Rwanda areba, anasobanurirwa imikorere yabyo, kuri uyu wa Kane tariki ya 7 Kanama 2012 Minisitire w’Intebe Dr Habumuremyi Pierre Damien aherekejwe na Minisitiri Protais Musoni, n’abandi bayobozi batandukanye batemberejwe n’ahakorerwa n’Ikompanyi ya Rwandair Express basobanurirwa hamwe birambuye imikorere yayo.

Batemberejwe mu bice bitandukanye bigize ikibuga cy’indege harimo ibyumba bikonjesha bibikwamo ibiribwa n’ibindi bintu bishobora kwangizwa n’ubushyuhe, batemberezwa mu byumba bisuzumirwamo ingendo z’indege zisohoka n’izinjira, ahabikwa zimwe mu ndege, berekwa bimwe mu bikoresho byifashishwa ku kibuga cy’indege birimo ibitwara imizigo, ndetse banatemberezwa mu biro bikorerwamo n’abakozi ba Rwandair n’ahandi hatandukanye.

Minisitiri Habumuremyi mu bibazo yagejejweho, yabwiwe ko mu ndege Rwandair ikoresha ebyiri gusa arizo z’u Rwanda aho izindi zose zikodeshwa kandi nabwo ngo zitwara abantu bari hagati ya 30 na 40 kandi ngo zikanywa cyane. Ibindi bibazo bahura nabyo harimo icy’inyubako zidahagije zituma batagira ahasuzumirwa n’indege hahagije, bifuzako hakongerwa amafaranga ku bakozi bitewe n’uko abakoramo bamaze kuba benshi, barifuza kongera ubushobozi mu guhangana n’andi masosiyete y’indege, izamuka ry’ibyo indege zinywa n’ibindi bibazo n’ibyifuzo bitandukanye.

Bitewe n’uko Ikibuga cy’Indege Mpuzamahanga cya Kigali kimaze kuba gito, hatangiwe imirimo yo kubaka ikindi mu majyepfo y’Uburasirazuba, mu Karere ka Bugesera, kizaba ari kinini ku buryo buhagije kandi cyubatse ku buryo bwa kijyambere bujyanye n’amabwiriza y’ibibuga by’indege ku rwego mpuzamahanga.

Ubwo indege za Rwandair zari eshanu mu mwaka wa 2011-2012, zatwaye abantu 253,877 zijya ahantu 13 hatandukanye. Mu cyerekezo bifuza kugEramo ni uko muri 2020-2021 Rwandair izaba zitwara abantu 1,033,817 ari indege 12 zijya ahantu 30 hatandukanye ku Isi.

Minisitiri Dr. Habumuremyi Pierre Damien yasabye abahagarariye Rwandair kwihutisha ibikorwa byabo kuburyo bikorwa mu gihe gito gishoboka aho bizafasha u Rwanda n’abanyamahanga gukorera mu gihugu ku buryo bworoshye kubera ko ingendo zizaba ari nyinshi, ngo bizanafasha u Rwanda kwihuta mu iterambere ry’ikinyagihumbi ruganamo cya 2020. Minisitiri Habumurenyi kandi yanabemereye ubufatanye muri bimwe mu bikorwa by’ingorabahizi yagejejweho.

Foto:Kwizera E.