Minisitiri w’Intebe Dr Habumurememyi Pierre Damien kuri uyu wa kabiri, tariki ya 30 Gicurasi 2012 yasuye ikigo cy’itumanaho cya Tigo, agamije kureba imikorere yacyo ijyanye na serivisi giha abafatabuguhzi bacyo.

Uru ruzinduko akaba arukuze bitewe n’uko yari amaze iminsi abonye ku rubuga rwe rwa “twitter” ubutumwa bw’abaturage binubiraga umuvuduko muto wa internet itangwa nicyo kigo.

Nkuko bitangazwa na Minisitiri w’urubyiruko, itumanaho n’ikoranabuhanga Nsengimana Jean Philbert, uruzinduko rwa Minisitiri w’Intebe rwari rugamije kuganira n’ubuyobozi bw’ikigo kugira ngo yumve imigabo n’imigambi bafite, ndetse harebwe n’uburyo intego Guverinoma ifite yo guteza imbere Abanyarwanda mu ikoranabuhanga Tigo yabigiramo uruhare, barebe kandi n’uko serivisi batanga yagenda neza, Abanyarwanda benshi bakabona imirimo ndetse no guteza imbere uburezi ku rubyiruko.

Minisitiri Jean Philbert Nsengimana yagize ari: “Hari ibintu Minisitiri w’Intebe yashimiye Tigo; ukuntu bafasha urubyiruko guhanga imirimo, n’uburyo basakaza ubumenyi mu gihugu. Hari kandi nibyo yabasabye gushyiramo imbaraga kugira ngo ubwiza bwa serivisi butangwa bushobore kuzamuka.”

Minisitiri w’Intebe yasabye Tigo gufatanya na Leta muri gahunda yayo yo guteza imbere Abanyarwanda mu ikoranabuhanga, ko kandi buri muryango wagira byibura telefoni imwe igendanwa, kandi na buri mwana wese uri hejuru y’imyaka 16 bikaba uko.

Umutoni Chantal, Umuyobozi w’ubucuruzi muri Tigo aragira ati:”Twishimiye uruzinduko rwa Minisitiri w’Intebe, kugira ngo Guverinoma imenye ibyo dukora. Tumaze gusurwa naba Minisitiri bagera kuri bane badusanga mu biro bareba ibyo dukora, kandi kenshi impanuro baduha zidufasha gukora neza ubucuruhzi bwacu. Icyo twemeranijeho ni ugutanga internet nziza ku bafatabuhguzi no kugeza ku baturage telefoni ziciriritse”.

Minisitiri w’Intebe a yabanje gusura serivisi za tekiniki ziri i Nyarutarama mu Karere ka Gasabo, aho yasobanuriwe imikorere yazo, asozereza uruzinduko rwe ku cyicaro gikuru kiri ku Muhima aho yagiranye ikiganiro kigufi n’abayobozi n’abakozi ba Tigo.