Mu rwego rwo kumenya amateka ya Bisesero, abakozi ba Sosiyete y’itumanaho ya MTN, basuye urwibutso rwa Jenoside yakorewe Abatutsi rwa Bisesero, aho bari baje kureba uburyo aba bantu bahiciwe bagaragaje umuco wo kwigira birwanaho ndetse no gutera inkunga mu iyubakwa ry’uru rwibutso n’abaharokokeye muri rusange.

Aba bakozi ba MTN bakigera kuri uru rwibutso rwa Bisesero ruherereye mu karere ka Karongi, babanje guhabwa amateka y’aka gace n’umusaza witwa Ntaganira Damascene, wavuze ko byatangiye mbere abitwaga Abasesero batotezwa, nyamara ngo nta n’ubundi buhanga bari bafite uretse inka bari batunze gusa.

Ntaganira avuga ko Abatutsi biciwe kuri uyu musozi wa Bisesero, udashobora kumenya umubare wabo kuko nyuma yo kumara amaze arenga 3 birwanaho, baje gucibwa intege n’uko uwari Minisitiri w’intebe Yohani Kambanda, yakoresheje inama akavuga ko muri aba bantu harimo abasirikare, byanatumye ngo hahuruzwa intara 4 zose zikabagaho ibitero by’intwaro zikomeye.

Avuga ku ruhare rw’ingabo z’Abafaransa, Ntaganira yatangarije abakozi ba MTN ati “Njyewe niboneye abo basirikare barasa abantu batatu twari turi kumwe, byanatumye ducika intege. Ikindi kandi baraje batubeshya ko bagiye kuturindira umutekano, aho batubwiraga ngo tubasange, ariko abagiyeyo bose biciwe imbere yabo babarebera.”
Umuyobozi ushinzwe abakozi muri MTN Asimwe Mary, yatangaje ko igikorwa aba biciwe Bisesero bakoze cyo kwirwanaho ari ukugaragaza umuco wo kwigira, avuga ko ari yo mpamvu bazanye urubyiruko rukora muri MTN, kuko wasangaga baragiye ku zindi nzibutso ariko batazi uburyo aba bantu biciwe Bisesero babanje kwirwanaho. Yagize ati “Twaje kubereka ko kugira umuco wo kwigira bigaragarira no kwirwanaho udategereje abandi, nk’ibyo Abatutsi ba Bisesero bakoze.”

Asimwe Mary kandi yatangaje ko MTN miliyoni 2.5 bazigeneye abacitse ku icumu muri Bisesero batishoboye aho bazabaguriramo inka, mu rwego rwo kubereka ko iki kigo cyibazirika n’u Rwanda muri rusange. Yongeraho ko izindi miliyoni 2, zagenewe kuvugurura Urwibutso rwa Bisesero kugira ngo izo ntwari zagaragaje ubutwari zihashyinguwe, zikomeze guhabwa icyubahiro zikwiye.

Uretse iki gikorwa cya Miliyoni 4.5 MTN yageneye Urwibutso rwa Bisesero rushinguwemo imibiri isaga ibihumbi 50, hari ibindi bikorwa ikora cyane cyane mu gihe cy’icyunamo aho ifasha mu kubakira abatishoboye, kubagenera inka, kubaka amashuri n’ibindi.