Mu rwego rwo guhashya abayobozi b’ibigo by’amashuri bimwe na bimwe bishyiriragaho amafaranga y’ishuri (Minerval) uko bishakiye, mu Karere ka Muhanga hashyizweho amafaranga ntarengwa ku bigo byose bya leta n’ibifashwa na yo.

Mu nama yahuje abayobozi b’ibigo by’amashuri akorera mu Karere ka Muhanga n’ubuyobozi bw’aka karere ku wa 19 Ukwakira 2012, bimwe mu byemejwe ni uko amafaranga y’ishuri ibihumbi 34 ku biga mu cyiciro rusange ari yo atagomba kurenzwa, ibihumbi 41 ku biga mu mashami, n’ agahimbazamusyi k’ibihumbi bitandatu azajya atangwa buri gihembwe.

Hemejwe kandi ubwishingizi bw’1200, ikarita y’ishuri ya 300, umwenda w’ishuri w’ibihumbi 11, umupira kuri 4500 na mutiweli ku bihumbi bitatu.

Bamwe mu bayobozi b’ibigo by’amashuri badutangarije ubwiza bw’iki gikorwa : Nkundisano Jean Pierre uhagarariye uburezi mu murenge wa Mushishiro, avuga ko bizorohereza ababyeyi batangaga amafaranga menshi ku bigo bimwe na bimwe.

Mugenzi we wo mu murenge wa Shyogwe Mukanyabyenda Emmanuelie, we avuga ko babyakiriye neza kuko muri iyi minsi hari ibibazo by’amikoro ku babyeyi ari yo mpavu ibi byemezo bifashwe, basaba njyanama y’akarere kuzabyemeza nk’uko na bo babihuriyeho nk’abayobozi.

Ku ruhande rw’amashuri yasabaga amafaranga menshi ugereranyije n’ayemejwe, na bo bavuga ko nta kibazo kinini bizatera. Ngaboyamahina Eraste, ashinzwe amasomo mu rwunge rw’amashuri rwa Mutagatifu Yozefu rw’i Kabgayi. Avuga ko amafaranga batangaga yari hafi y’ayo, ko nta kibazo bibateye, gusa ngo aho bashobora guhura na byo ni aho agahimbazamushyi kari ku bihumbi birindwi kakaba kabaye ibihumbi bitandatu.

Hakizimana Varelie ushinzwe uburezi mu karere ka Muhanga, avuga ko guhuza amafaranga ku bigo bya leta n’ibyo ifasha byatewe n’uko hari ibigo byazamuraga amafaranga uko byishakiye.

Yihanangiriza abayobozi bari munsi y’ibiciro byashyizweho kuturizaho n’ifaranga na rimwe ngo bageze ku yo bemeje, keretse babyemerewe na njyanama y’akarere kandi berekanye n’impamvu yo kuyuriza.

Ibi biciro byashyizweho bizemezwa n’inama njyanama y’Akarere ka Muhanga, bitangire kubahirizwa mu mwaka utaha nyuma y’uko Minisiteri y’uburezi ihuje ibiciro mu mashuri yose yo mu Rwanda.