Bamwe mu baturage bo mu karere ka Ngororero bavumbuye umurimo kwahira ubwatsi ku misozi, bakabucuruza kugira ngo babone ikibatunga.

Bamwe mu rubyiruko rutize n’urudafite akazi, bihangiye imirimo yo kwahira ubwatsi ku misozi bakabugurisha n’aboroye baba bafite ubudahagije.

Abakora uyu mwuga muri aka karere bagenda biyongera. Aba basore n’inkumi bahira ubwatsi bw’amatungo. Usanga akenshi bahira mu mu mashyamaba ya Leta.

Umwe mu bakora aka kazi, Bamporineza Jean de Dieu, avuga ko kubera abantu benshi bororera mu biraro, ubwatsi bw’amatungo babukenera mu gihe buba bwababanye bukeya. Ariko kandi hari n’abahinzi bamwe bakenera ubwo gusasira imyaka itandukanye.

Umutwaro umwe w’ubwatsi ugura hagati y’amafaranga 100 na 150, ku munsi akaba ashobora kugurisha imitwaro itanu.

Iyi mirimo ngo hari aho usanga abana bato basiba ishuri na bo bakajya kwahira ubwatsi bwo kugurisha. Ubuyobozi bw’akarere buvuga ko butazihanganira ababuza abana kwiga bakabashora muri iyo mirimo.