Abantu 36 barimo bahitanywe n’impanuka ya bisi yagonganye n’ikamyo itwara peteroli mu Majyepfo ya Nigeria, impamvu nyamukuru yateye iyi mpanuka ikaba ikigenzurwa.

BBC dukesha iyi nkuru ivuga ko ubusanzwe Nigeria iri mu bihugu bya mbere muri Afurika aho impanuka zo mu mihanda ziza ku isonga mu guhitana ubuzima bw’abantu.

Jonas Agwu, umuvugizi wa komisiyo ishinzwe umutekano wo mu muhanda yatangarije AFP ko impanuka yabaye ejo hashize ahagana saa saba z’amanywa. Abatakaje ubuzima ni abagenzi 30 bari muri bisi, 4 bari mu ikamyo yari itwaye peteroli n’abana babiri bari mu igaraji ryo hafi y’ahabereye impanuka.

Iyi mpanuka ngo ije nyuma y’indi iherutse kuba bisi ebyiri zimaze kugongana hagapfa abantu 18 no muri Nyakanga umwaka ushize abantu 100 bakaba barapfuye muri aka karere ka Nigeria mu mpanuka y’itanki yari itwaye peteroli, bazize umuriro wabatwitse bashaka uko batwara bavoma peteroli muri iyo tanki yari imaze kugwa.