Minisiteri y’Ubucuruzi n’Inganda itangaza ko izafatanya na Minisiteri y’Ubuhinzi kubyaza ibirayi umusaruro ugatunganywa kuburyo umara igihe kinini ukanabasha kujya ku masoko mpuzamahanga. Uyu musaruro uzagirira akamaro abaturarwanda n’abahinzi b’ibirayi.

Mukiganiro na IGIHE, Alex Ruzibukira, uhagarariye inganda muri Minisiteri y’Ubucuruzi n’Inganda yagize ati :” Tuzashyira ibikorwa remezo mu buhinzi bw’ibirayi, ntabwo kuzana inganda zitunganya ibirayi bizatinda, kuko muri gahunda ya Hanga umurimo hari inganda ziciriritse zatangiye gutunganya umusaruro wibirayi ukorwa mo amafiriti yumye, ariko si kurwego rushimishije. Inganda twifuza ko zizawutunganya ni izo ku rwego rwiza”.

Yakomeje avuga ko uyu musaruro ukwiye kongerwa. Yagize ati: ” Minisiteri y’Ubuhinzi ahubwo ikwiye gushishikariza abahinzi guhinga ibirayi byinshi, tukihaza tukanabyohereza hanze, tukabibyaza umusaruro atari ukubihinga tukabicuruza gusa, turashaka ko utunganya ukabikwa igihe kirekire”.

Avuga ko inganda bateganya kuzana muri gahunda yo kubaka inganda mu tutrere tune twateganyijwe turimo Nyabihu, Rusizi, Bugesera na Huye muri uyu mwaka n’utaha, mu Karere ka Nyabihu bazita no kumusaruro w’ibirayi uhera.

Yagize ati:”Turashishikariza abahinzi ba nyabihu kongera umusaruro kuko hazubakwa inganda, tuzanashishikariza abashoramari kwita ku bihingwa bihaboneka”.

Akomeza avuga ko inganda ziciritse zisanzwe zitunganya uyu musaruro ariko ugasanga bakoramo amafiriti yumye mu birayi no mu bitoki atari ku rwego rwiza bityo akaba ari yo mpamvu hateteganyijwe ibi bikorwa. Umusaruro uzaba watunganyijwe uzifashishwa mu bucuruzi butandukanye,aho uzabasha kujya ubikwa igihe kirekire utangiritse, kandi uzaba ufite ubuziranenge.

Abahinzi b’ ibirayi batangaje ko bizabafasha kubona isoko ryiza kandi rihora ho bakabasha gukomeza kwiteza imbere.