Mu ijoro ryo ku wa mbere tariki ya 01 rishyira iya 02 Nyakanga 2012, umukarani uzwi ku izina rya Silas wari mu kigero cyo hagati y’imyaka 25 na 30 y’amavuko yishwe n’abakarani bagenzi be bamukubise igitiyo mu mutwe.

Amakuru dukesha Radio One, avuga ko ubwo bwicanyi byabereye ahitwa i Kiruhura, mu Kagari ka Nyabugogo, Umurenge wa Kigali, Akarere ka Nyarugenge mu Mujyi wa Kigali.

Nk’uko bitangazwa n’ababibonye bavuga ko hari nko mu saa yine y’ijoro, hafi yahari habereye ubukwe. Ubwo nyakwigendera yari ahanyuze yahuye n’abandi bakarani bane bahita bamusumira bamukubita igitiyo mu mutwe ahita apfa.

Ubwo Polisi y’igihugu yahise ihagera ifata umurambo iwujyana kwa muganga aho ugomba gukorerwa ibizamini. Abamwishe ubu bari mu maboko ya Polisi kandi bamwe muri bo barabyemera.

Nk’uko bikomeza bitangazwa n’ababibonye, bavuga ko ubwo bwicanyi ntaho buhuriye n’ubwo bukwe bwari bwatashye ko ahubwo hari ibindi bapfaga kugeza ubu bitaramenyekana.

Hagati aho turacyagerageza kuvugana n’Umuvugizi wa Polisi y’Igihugu kugira ngo tumenye icyaba cyateye ubu bwicanyi.