Mu gihe hazirikanwaga ku munsi mpuzamahanga w’umugore wo mu cyaro, abagabo n’abagore mu Murenge wa Kitabi bishimiye ko ubuharike bwari bwarabaye akarande muri ako gace gahana imbibi na Pariki ya Nyungwe bugenda buyoyoka, ibi bikaba ikinyetso cyiza cy’iterambere ry’umugore wo mu cyaro.

Mu myaka yashize, ubuharike bwakunze kugaragazwa nka kimwe mu bibazo by’ingutu byibasiye abagore bo mu cyaro mu mirenge ihana imbibi na Pariki y’igihugu ya Nyungwe mu Karere ka Nyamagabe.

Umwe mu baturage Ngirabinego Callixte, ati “Ubu ngubu byifashe neza! Abagore bacu ntibagikandamizwa, ubuharike twarabuciye burundu! Ubuharike! Bwadindizaga ingo, hakabaho kubyara abana benshi maze bigatuma abana na bo basubiranamo !”

Mugenzi we Mukashyaka Pétronile, agira ati “Ubu ngubu umugore wo mu cyaro ntabwo agikandamizwa nk’uko byari biri. Ubuharike bwagiye bucika kubera Leta y’ubumwe, umugore wo mu cyaro atera imbere kandi n’iyo umugabo ashatse kuzana ubuharike cyangwa irindi hohoterwa umuntu yiyambaza inzego z’ubuyobozi…….”

Umuyobozi w’Akarere ka Nyamagabe Mugisha Philbert, avuga ko ivugururwa ry’amategeko, imikoranire y’inzego za Leta n’imiryango itandukanye byagize uruhare runini mu guhashya ubuharike muri aka gace.

Kuri ubu mu mirenge itandukanye hashyizweho ibyumba ingo zibanye neza zihuriramo n’izifite amakimbirane zikazigira inama, kandi n’abaturage bamaze kumva ko guharika bidindiza iterambere ry’ingo zabo.

Muri ibi birori umuryango Reseau des femmes wagabiye inka 36 amakoperative atatu y’abatishoboye n’ababana na Virusi itera Sida ndetse haterwa n’ibiti by’imbuto byifashishwa mu kuzamura imirire mu baturage.