Mu gihe ku nshuro ya kane mu gihugu hose hatangiye Itorero ry’urubyiruko rw’abanyeshuri barangije amashuri yisumbuye, abari gukorera mu karere ka Nyamasheke basabwe kuzirikana amasomo bahabwa.

Itorero ry’uyu mwaka wa 2012 ryatangiye ku wa 30 Ugushyingo rikazasozwa ku wa 22 ukuboza.

Mu Karere ka Nyamasheke umuhango wo gutangiza iri torero ku mugaragaro ryabaye kuri uyu wa kane tariki ya 6 Ugushya2012 kuri EAV Ntendezi mu murenge wa Ruharambuga. Intumwa y’Itorero ry’Igihugu mu Karere ka Nyamasheke Muhire Hilaire yashimye ko uyu mwaka bigaragara ko Itorero rimaze kumvikana neza n’akamaro ka ryo.

Muhire yasabye abari guhabwa ibiganiro kubikurikira neza kuko intego z’itorero atari ukubyina ahubwo ari ukwigisha indangagaciro kugira ngo umuco ugaruke mu Rwanda, ubusabane, amahoro, ubumwe, ubworoherane n’ubwiyunge bisagambe.

Yasobanuye ko indangagaciro mu Rwanda ari nyinshi ariko zishingiye ku ntego z’Igihugu ari zo Ubumwe, Umurimo no Gukunda Igihugu.

Muhire yibukije ko Itorero ry’urubyiruko rurangije amashuri yisumbuye ribaye ku nshuro ya kane, ariko uyu mwaka hakaba agashya k’uko nyuma yo guhugurwa, urubyiruko ruzajya ku rugerero mu mirimo y’ubwitange. Ibi bikazabagirira akamaro ubwabo ndetse n’Igihugu muri rusange.

Yashimangiye ko Itorero ari ishuri ry’Indangagaciro na kirazira zizabafasha gukoresha neza ubumenyi bakura mu mashuri asanzwe bityo bagateza Igihugu imbere.

Afungura Itorero ku mugaragaro, Umuyobozi w’akarere ka Nyamasheke Bwana Habyarimana Jean Baptiste, yavuze ko Itorero ryahozeho mu gihugu, kandi rikaba ryari irerero urubyiruko rwigiragamo indangagaciro na kirazira z’umuco nyarwanda hagamijwe ubwubahane, kubana neza kandi basobetse ubumwe, bigatuma Abanyarwanda bibona bose nka bene Kanyarwanda.

Umuyobozi w’Akarere yibukije na none ko Itorero ryaje gusenywa n’abakoroni bari bagamije amacakubiri kugira ngo babone uko bayobora Abanyarwanda. Mu ri iki gihe itorero rikaba ngo ari ngombwa mu kwishakamo ibisubizo nta kubitegereza ku banyamahanga.

Umuyobozi w’Akarere yabwiye urubyiruko ruri mu itorero ko iminsi rwagenewe ruhabwa amahugurwa ari ayo kurufasha gukurana umuco w’ubwitange, bakaba batezweho gukunda Igihugu kugira ngo bazagiheshe agaciro, kwiyubakamo ubunyangamugayo, kugira icyerekezo cy’igihugu n’icya buri muntu ku giti cye, gusobanukirwa neza na gahun da za Leta, kumenya Indangagaciro na kirazi, kikazatuma babasha kuba umusemburo w’iterambere ku buryo burambye.

Ubu mu Karere ka Nyamasheke Itorero riri kubera ku masite 3, kuri EAV Ntendezi, IJW Kibogora na GS Karengera. Abari mu Itorero bose bakaba ari 1656 harimo abahungu 869 n’abakobwa 787.